Aizawl FC lakah Police tlawm nawn

Mizoram Police FC-in I Day Football-a an mualphona Aizawl FC lakah phuba an la thei lo a, nimin tlai MPL8 inkhelah I League club AFC hian Police hi 1-0 in an hneh nawn.

Aizawl FC tan Rochhar-zela'n first half injury time-ah goal awm chhun a khung a, man of the match-ah thlan a ni.

Aizawl FC-in MFA Super Cup champion Mizoram Police chu 5-1 in I Day Football-ah an sawp a, Lalbiaksanga Colney ten result pawm harsa an ti. Nimin khan MPL-ah team pahnih hi an inhmachhawn nawn leh a, Aizawl FC tlarhnungten an tih tur an tih bakah Rochharzela'n goal ṭha bik a khung. Aizawl FC winger hian Police defender a vir khum hnuah a kei vei lamin mawi zetin a khung.

Police hi chak lo mah se inkhel an thunun zawk mah a, an chak lohna chhan erawh goal an khung thei lo. First half-ah Lalfakzuala leh Lalbiakhlua ten chance ṭha an hlah a, second half-ah inkhel an thunun lehzual a, goal an thun thei chuang lo.

Police-in siphurh sut tumin Malsawmfela an luhtir a, an goal nawr a nat belh. Amaherawhchu, AFC keeper Lalawmpuia'n Sawmfela goal khung tur a dansak a, captain Fakzuala, Lalsangbera leh F. Lalrinpuia ten an hun ṭha neih an chhawr lo.

Aizawl FC coach Standly Rozario chuan, "Kan chak hi ka lawm  takzet a, chawlh hun kha kan hmang ṭangkai a ni," a ti.

Aizawl FC-in MPL8-a a vawi khat nan hnehna an chang a, match thum khelahh chak loh an la nei lo. Mizoram Police erawh an vawi khat chak lohna a ni a, hmahruaitu an la ni thung.