Serie A hmahruaitu nih inchuh Inter Milan mualah Juventus

Pathianni zan dar 12:15 hian Serie A inkhel hmuhnawm leh ngaihven hlawh bik a awm dawn. Champion lai Juventus chu season kal laia an tluk loh mek Inter Milan khelmualah an lenglut dawn a, inkhel result hian league hmahruaitu a thlak danglam theih laiin Inter hmahruaina a sawhnghet thei bawk.

Season riat chhung zet chu Juventus hian Serie A-ah ro an rel tawh a, season hmasa khan Napoli nen inum ve deuh mah se nomawi an chawi tho. Kuminah erawh Antonio Conte kaihhruai Inter Milan an danglam tawh, Turin club tan nomawi humhim a awlsam dawn lo.

Juventus leh Inter Milan hi khaw hran daiha awm an ni. Juve hi Turin-ah an awm laiin Inter erawh Milan khawpuiah an awm. Mahse, Italian sports journalist Gianni Brera chuan 1967 khan club ropui pahnih inkhel hi 'Derby d'Italia' tih hming a lo vuah a, tun thlengin an hmang zui.

An intawn hmasak ber hian Juve lamin 2-0 in hnehna an chang a, an inkhelh hnuhnung ber kumin July 24 kha chuan hun pangngaiah 1-1 a nih hnuin Inter Milan hian penalty shoot out-ah 4-3 in hnehna an chang. Italy hmar thlang khawpui pahnih behchhana din club pahnih hi official match bikah chuan vawi 236 an inkhelhna tur chiah a ni ang.

Serie A match ruk khelh tawhah Inter Milan an la chak vek, Italian manager Conte-a'n a player neih a hmang thiam tih a chiang. Chutihrualin an elpui tur Juventus leh Napoli an la hmachhawn loh avangin eng ang taka ṭha nge an nih tih chu fiah a la ni lo.

Champions League-ah Barcelona an ngam lo hlim a ni a, Inter hian Catalan club lakah striker Romelu Lukaku chu hliam vangin an chhawr thei lo. Belgium internatinal hi a dinhmun a la chiang lo a, Juve lakah a inlan a nih pawhin 100% fit chu a ni kher lo ang.

Kum 50 mi Conte hian Barca an hneh loh hnuah, "Hnehna chan phu zawk khawpin kan khel," a ti. Spanish champion laka an khelh angin Juve lakah an khel leh thei a nih chuan Italian manager hian a club hlui lakah point an beisei ngam ang.

Cristiano Ronaldo a awm chuan Juventus tan goal khung lamah lungngaihna tur a awm lo. Mahse, Real Madrid forward hlui hi khawl a nih bik loh avangin 'nil' ve thei a ni, a bik takin tlarhnung rem phui Inter laka goal khung a awlsam dawn lo.

Maurizio Sarri-a'n tlarhma a siksawi nasa ṭhin a, striker Gonzalo Higuain nge Paulo Dybala a hman zawk dawn tih a la sawi chiang thei lo. Midfield erawh Juve chungnun theihna lai tur a ni ang. Arsenal midfielder hlui Aaron Ramsey leh Miralem Pjanic ten ball an thiam a, tharum hmang turin Sami Khedira an nei bawk.

Chelsea manager hlui Sarri hian season tir lamah damlohna vangin team a enkawl thei lo, a dam hnuah hnehna chang tluang viau mah se league-ah chuan chetsual theihna tur khawpa lian an la hmachhawn lo - Inter hi an tan fiahna a ni ve tho dawn tihna a ni.