Zverev leh Tsitsipas te an tlang

China Open khelh laiah champion tura rinkai Alexander Zverev leh Stefanos Tsitsipas te chuan harsatna nei loin quarterfinal an in vaw kai a, champion lai Nikoloz Basilashvili erawh a zinkawng a tawp thung.

Ningani zan inkhelah Zverev hian Felix Auger-Aliassime chu 6-3, 6-1 in a hneh a, German tlangval hian season hman laiah service ṭha a nei hlei thei lo - tun inelna bikah erawh a ball vuak a dik leh tawh hle. Last 16 inkhelah hian a first serve aṭanga point hmuh theih 27 zinga 25 chu a hmu a ni.

Kum 22 mi Zverev hi a khel ṭha tluang a, a khingpui hi break point pawh a hmuhtir miah lo. Semifinal lut tur erawh chuan tawnhriat nei ṭha Sam Querrey a paltlang leh a ngai dawn. Inkhel dangah rawlthar beiseiawm Tsitsipas chuan champion lai Basilashvili chu 4-6, 6-3, 6-2 in a hneh. Greek tlangval Tsitsipas hi khel ṭha zawk tia sawi tur chu a ni bik lo. Mahse, a khingpui Basilashvili-a'n tihsual a ngah, double faults ringawt pawh vawi nga a neih chu a vanneihpui a ni.