Barca an tho hlen dawn em?

Pathianni zan dar 12:30-ah Barcelona chuan La Liga match khel turin Sevilla an mikhual dawn a, zawhna awm chu Catalan club hi an tho hlen thei dawn em? tih hi a ni. 

Ernesto Valverde enkawlna hnuaiah Barca hian season bul an ṭan ṭha lo. Mahse, Granada laka 2-0 a an tlawm hnuin match thum chu a zawnin an chak leh tawh a, eng nge an an zel dawn hriat a châkawm hle - Pathianni zanah a hriat dawn e. 

Sevilla hian Ningani zan khan Europa League-ah APOEL Nicosia chu 1-0 in an hneh a, an phur vanglai tak a ni. 

Tun season-a Barca buaina ber chu tlarhnung a ni a, he buaina hi an chingfel lawk dawn lo niin a lang bawk. Clement Lenglet chu hrem vangin a inlan thei dawn lo a, Samuel Umtiti, Jordi Alba leh Junior Firpo ten training an la zawm lo vek bawk. 

La Liga match sariha goal 10 chhuah tawh team hian Gerard Pique hona hnuaiah Jean-Clair Todibo, Nelson Semedo leh Sergi Roberto-te an chhawr a ngai dawn tihna a ni a, a harsa dawn.

Barca fan-te inhnemna tur chu 'Messi a dam tawh' tih hi a ni. Lionel Messi hian hliam vanga Getafe a hmachhawn loh hnuin Champions League-ah a lo kir leh tawh a, Inter Milan chu a tuar hmasa bertu an ni. Argentine striker hian 2-1 a an chakna inkhelah goal khung lo mah se inkhel khaidingtu a ni a, Luis Suarez goal hnihna a assist phei chu ngaihzawng thar ang maia thlir ninawm loh a tling. 

Hriat tel atana ṭha chu Barcelona leh Sevilla hi table-ah an inthlau lo. Barca hi palina niin Sevilla hi parukna ni mah se point 13 ve ve an nei a, goal difference chu an dinhmun thliartu a ni. Real Madrid boss hlui Julen Lopetegui enkawlna hnuaia khel Sevilla hian an hun ṭha neihah Barca lehpelh ngei an tum dawn a, chumi tur chuan winger Lucas Ocampos, attacking midfielder Oliver Torres, midfielder Joan Jordan, striker Nolito leh Javier Hernandez te ho chet ṭhat a ṭul ang. 

Catalan club-in league match sarihah vawi li chiah hnehna an la chang a, vawi hnih an tlawm a, vawi khat draw an nei - anni ang club tan chuan season bul ṭan dan chhe tak a ni. Mahse, Barcelona vanneihna chu an elpui ber hmahruaitu Real Madrid leh pathumna Atletico Madrid-in beisei an phak bik lo a, point khat chiahin an thlau - Barca tan engkim beiseina a la awm. Atletico hian Pathianni zan dar 7:30-ah Valladolid an lenchilh dawn.