Arsenal rawlthar an thiam

Ningani zan khan Arsenal chuan an rawlthar rual hmangin Standard Liege 4-0 in an sawp a, kum 18 mi striker Gabriel Martinelli chuan goal hnih a khung bakah Dani Ceballos khung tur a siamsak bawk.

Emirates Stadium-a inkhelah nipui bazar laia pound maktaduai ruk senga an lakluh Martinelli hian minute 13 leh 16-ah goal khungin a team chu dinhmun ṭha takah a dah. Kum 20 mi Joe Willock chuan khung belh lehin chawlhlawk hmain 3-0 in hma an hruai fal hman.

Second half-ah pawh Gunners an chungnung, Brazilian player Martinelli chuan Ceballos-a'n North London club tana a goal hmasa ber a neih theih nan a siamsak a, match hnih aṭanga point ruk hmuin Europa League Group F hmahruaitu an ni.

Unai Emery-a'n tun season chhungin rawlthar rual a chhawr nasa hle, an match hnuhnunga Manchester United hmachhawntu player aṭangin mi 10 ngawt a siksawi. Mahse, United nen an inkhelh ang bawkin German midfielder Mesut Ozil chu squad-ah telh a ni lo.

Willock, Martinelli te bakah kum 19 mi Reiss Nelson a hmuhnawm a, nipui laia lak thar Kieran Tierney pawhin bul ṭanin an goal hmasa ber tur a siamsak; an goal hnihna hi Nelson-a assist a ni thung. Gunners manager Emery chuan, "Match hnih khelh hnua point ruk hmuh hi a ṭha hle. Player zawng zawng khan an tih theih tawk ṭheuh ṭha takin an hlen chhuak, ball ken rei theih leh hloh tlem dan erawh kan la zir belh a ngai," a ti.

Arsenal hi Thawhṭanni zanah United nen an inkhel a, Ningani zanah Europa League an khel zui - Pathianni zan dar 6:30 hian Premier League match khel turin Bournemouth an mikhual zui leh ang.

Spanish manager Emery-a'n Standard Liege lakah player naupang rual a hman avangin league-ah chuan senior player an inlan zui leh tawh ang. Gunners tana lawmna tur chu Hector Bellerin inkhel thei tawh hi a ni a, defender dang Rob Holding leh Tierney te pawh harsatna nei loin minute 90 an inlan thei tawh.

EPL table-ah Arsenal hi palina an ni mek, hmahruaitu Liverpool nen an inkarah point kua zet a awm. League nomawi sawi ri ngam rih lo mah se match neih tam vanglaia point thum an hmu thei a nih chuan Champions League khelh an beisei ngam ang.