Sanga hnuaiah Electric Vengin hnehna an chang ta

I Day Football 2019 champion Electric Veng FC-in Mizoram Premier League Season 8-ah a vawi khat nan hnehna an chang a, Ningani zan khan Chawnpui FC 3-1 in an hneh.

Champion rinkai zinga mi Lalsangzuala Hmar hote hian chak turin vanneihna an mamawh a, point la hmu lo Chawnpui FC-in an phu tawk result an hlawh chhuak lo. Electric Veng tan Vanlalremkima, Ramhlunchhunga leh David Lalchhuanawma ten goal khat ṭheuh an khung a, Chawnpui tana Lalnunmawia goal-in inkhel a tidanglam pha lo.

Chawnpui FC coach HC Zarzoliana'n tawnhriat nei ṭha Lalnunmawia chu goal nawr turin a dahlut nghal. Mawitea pui tur hian a nau Vanlalthlamuana, Jerry  F. Zonunsanga leh Moody Lalawmpuia te awmin bench-ah theihna nei sang Larry Lalrinawma te an awm bawk avangin Chawnpui hi 'point box' tur ni loin semifinal lut thei tur an ni.

Sanga'n season liam taa Electric Veng innghahna David-a bench-ah a la ṭhuttir a, FC Venghnuai aṭanga an lakluh player tlan chak Vanlallawma'n bul a ṭan. An starting eleven-a mit la lai erawh an tlarhnung a ni a; PC Laldinpuia, Rorelliana, Zomuanpuia leh K. Lalmalsawma (Buanga) te an awm a, goalkeeper-ah Mizoram keeper Lalmuansanga awm bawkin an khawng ṭha dawn tih a chiang. 

Electric Veng buk a rit zawk a, bul pawh an ṭan ṭha. An veng tlangval Vanlalremkima'n (Tetea) Buanga hnen aṭanga a ball hmuh chu vawi khatah a ke chhe lama petin minute riatna lekah goal hmahruai a khung. Talent nei ṭha Chhunga a rawn lang zui a, Mizoram team-a tel pha midfielder hian freekick aṭangin minute 25-naah a khung.

Goal hnihin Chawnpui a beng harh a, vanneihna erawh an nei lo  - Vanlalthlamuana'n keeper Muansanga vawi hnih a hmachhawnah a hlah ve ve. Beiseina siam turin Mawitea'n minute 37-naah freekick aṭangin si phurh a sut ṭhen. Coach Zara'n halftime-ah a naute nasa lehzualin a fuih tih a lang a, second half-ah Chawnpui FC-in inkhel an thunun a, an hmuhnawm a, an che vel a rangin  Electric Veng an talbuai hman hle.

Amaherawhchu football-a pawimawh ber chu goal a ni a, Chawnpuiin goal an thun theih lohlaiin second half-a bet zawk Electric Veng zawkin goal an thun leh ta - Electric Veng substitute David-a'n inkhel bul ṭan tlak a ni tih pholan nan minute 84-naah chak nemnghehna goal a khung.

Electric Vengin October 9, Nilaini hian Chhinga Veng an hmachhawn dawn a, Sanga'n hlawhtling taka season hnih a enkawl tawh Chhingcows a hmachhawn tur hi a hmuhnawm ang - veng ṭhenawm inkhel tur a ni a, ‘derby match’ angin a sawi theih.

Chawnpui FC-in kai thar FC Venghnuai an hmachhawn dawn a, an tiat tawka ngaih Ramhlun North an hneh tawh loh avangin coach Zara leh a hote tan inkhel pawimawh bik a ni dawn.