Champion zia pho chhuaktu Liverpool chak

Chak dawn lo emaw tih hnua hnehna chan hi 'champion zia' tiin an sawi ṭhin a, chu champion zia chu Inrinni zan khan Liverpool-in an pho chhuak. 

Liverpool hian an mikhual Leicester City chu 2-1 in an hneh a, hun pek belh minute nganaa James Milner-a penalty chhuih luh chu Liverpool chakna a ni. Reds hian Sadio Mane goal hmangin minute 40-naah hma an hruai a, minute 80 thleng chu he goal hi an ring tlang dawn niin a lang hman. 

Mahse, Foxes-in James Maddison hmangin si phurh an rawn sut a, Anfield-a reh. A tawpa dingchang erawh Liverpool an ni leh ta tho a, champion rim an nam. 

Liverpool tan Sadio Mane a hmuhnawm a, Senegalese forward hian goal a khung bakah penalty a hlawh chhuak bawk. Reds tan chhandamtu a ni. Minute 40-naa Mane goal khung hi James Milner siamsak a ni a, Mane hian Foxes keeper Kasper Schmeichel dan rual lohin goal kil sirah tak a dah lut. 

Maddison-a'n minute sawm chauh a awm tawh tihin si phurh a rawn sut a, Reds an hawihai - mahse Mane bawk a lo lang a, keeper Schmeichel leh substitute Marc Albrighton inringthul karah thiam takin a tlu a, penalty a hlawh chhuak. 

Referee-in VAR a rawn hnuah a thutlukna a sut lo a, Milner chuan 'cool' zetin a chhuih lut - Liverpool an chak a, hma an hruai zel. 

Match riat an khel tawh a, Liverpool-in Premier League-ah hnehna an la chang vek. Table chung ber an luah a, fan-ten champion an sawi ri. 

Match 30 ngawt khelh tur a la awm avangin champion sawi nan chuan a la hma hret tih a chiang a, mahse he team hi an thiamna piahlama vanneihnain a puih zel chuan nomawi an chawi lo ang tih a sawi theih loh. Reds hian season hmasa nena chhiar telin Premier League match 17 chhung chu a zawnin hnehna an chang ta a, Manchester City-in August - December 2017-a vawi 18 chak record an lo siam tawh chu an hnaih zel. 

Anfield bikah Liverpool hi league match 44 chhung chu a zawnin an tlawm tawh lo bawk a, vawi 34 chakin vawi 10 an draw - Europe top five league-ah mahni muala tlawm lo zawn rei ber an ni mek. 

Manchester United leh Tottenham Hotspur-in result ṭha an nei hleithei lo a, Frank Lampard hnuaia Chelsea insiamrem lai a ni bawk. Hetiang boruak karah hian hmuhnawm takin Leicester an khel ṭhin a, top four-a an tel phak hial rin a ni - Anfield-ah fak an nih chhan kan hmu. 

Reds tlarhma hmuhnawm tak chu rei tak an chelh thei a, counter attack-ah an hlauhawm ṭhin viau bawk. Liverpool boss hlui Brendan Rodgers-a hnathawh chu fak tlak a ni. Jamie Vardy-a'n a chance neih a chhawr theih loh a uiawm a, Alisson aiawha ding Adrian-a'n a hna a thawk ṭha tih a lang tel.

Liverpool tan Mohamed Salah chu hliam vangin lakchhuah a ngai a, hun pek belhah Adam Lallana chuan Egyptian forward hi a rawn thlak. Salah inhliam chhan hi Hamza Choudhury-a'n a tlawh vang a ni a, a tirah khelh luih tum zet mah se a tlin loh avangin lakchhuah a ni. 

Reds manager Jurgen Klopp chuan, "Hamza khan engtinnge yellow card chauh a hmuh theih? Mo-a'n khelmual a chhuahsan phah a, tih luih a nih bawk avangin a thinrim thlak a, ka lawm lo a ni," a ti. 

Salah hi engtia rei nge a chawlh dawn he thu buatsaih a nih lai hian hriat a la ni lo.