MotoGP Khawvelah Marc Marquez a tlan chak ber
Marc Marquez chu khawvel bike intlansiakna sang ber MotoGP-ah a vawi ruk nan a champion leh ta, tun hnaiah a zawnin season li chhung chu a chungnung ber a ni bawk.
Nimin chhun khan Thailand Grand Prix tlan a ni a, rider championship hmahruaitu Marquez-a'n pathumna aṭanga bul ṭanin hnehna a chang. Season kal laiah intlansiak vawi li la neih tur awm mah se Repsol Honda rider hi midang tan umphak theih a ni tawh lo.
Marquez a chak
Thailand GP an tlan dawn khan Marquez tan nomawi a him tluk a ni tawh a, a hnuai chiaha awm Andrea Dovizioso aia a thlen hmasak chuan a champion dawn tih a chiang a, beiseina sang tak nen Asia ramah a zin.
Inelna tak an neih hmain Marquez hi tlanchhina an neih laiin a tlu sual, damdawi inah hruai ngai mah se harsatna nei loin inelna a hmachhawn thei hlauh. Chang International Circuit-ah lap 25 an tlan laiin hnufual lai a nei lo.
Marquez elpui ber Andrea Dovizioso-a'n pasarihna aṭang daiha bul aṭan avangin Marquez tan buaina tur a awm lo a, lap hmasa lamah a hmaa awm Maverick Vinales tlan pelin, kawng kawi hnuhnung berah Fabio Quartararo a tlan
pel leh bawk.
October 20 hian Japanese Grand Prix an tlan leh dawn a, a hnu lamah Australian GP, Malaysian GP leh season khar nan Valencia GP an la tlan leh ang. Inelna hmabak an la ngah chunga a champion thei hi Marquez
ropui zia tilangtu a ni.
Mi bik chu
Tun season MotoGP-ah intlansiak vawi 15 a awm tawh a, champion Marquez hian vawi riat ngawt hnehna a chang! Pole aṭanga vawi kua bul ṭanin, podium-ah pawh vawi 13 ngawt a lawn - rider dang ten eng kawngah mah an phak lo.
Nimin khan Marquez hi kum 25 leh ni 231 mi chauh a la ni, bike intlansiakna sang berah vawi ruk champion thei naupang ber a ni. Kum 1971-a Giacomo Agostini record lo siam tawh (kum 29 leh ni 25) chu a khum chiang hle.
World champion Marquez chuan, "Champion nih kha ka rilru luahtu ber a ni lo, intlansiak vawi khata hnehna chan tumin inelna ka hmachawn. Ka thil tum leh duh chu harsatna tawk loin ka ti puitling thei a ni.
"Season duhawm leh hlimawm chu a ni chiang hle, tunah chuan hlim taka hlawhtlinna chan lawm hun a ni. Chutih rualin inelna zawng zawng kan la zo fel lo tih erawh hriat a ṭha," tiin intlansiak hmabak an la neihah inthlahdah a tum loh thu a sawi bawk.