Mizo boxer pathum an la chak

4th Elite Men's National Boxing Championship-ah Mizoram aiawha kal boxer pali zinga pathum Vanlalawmpuia, Laldingliana leh Zochhuanawma ten hnehna an chang a, H. Lalrinhlua (81 kg) erawh Delhi boxer Rahul lakah a vanduai thung.

Baddi, Himachal Pradesh-a inelna neihah hian Zirtawpni khan Vanlalawmpuia (63 kg) chuan Orissa boxer Abdul Rahman chu round 2-ah vawi thum hnek tluin referee-in inhnek a titawp. Khuangthing tlangval AwP-a han technical knockout hmangin hnehna a chang.

Nimin khan Republic Veng tlangval Zochhuanawma'n (69 kg) Nagaland boxer Nikito Sumi chu uninamous decision-in a hneh. Nimin vek hian Laldingliana'n (57 kg) Orissa boxer Muna Gouda a hneh a, Tuipui tlangval hian a hneh deuh hret avangin referee-in round 2-ah inhnek a titawp.

Vawin hian round of 16 khelh a ni dawn. SAI aṭanga inzir Laldingliana'n Delhi boxer Ranjan Said a hmachhawn ang a, Sete Boxing Academy aṭanga inzir AwP-a leh Zochhuana ten Jamil Thomas (Kerala) leh Parmod Kumar (All India Police) te nen an inhnek bawk ang.

Mizo boxer-te hian hnehna an chang a nih chuan quarterfinal an luh bakah National Games khel turin an tling ang. Mizoram aiawh kalte hi coach Lalfakzuala leh manager Lalhmingmawia Ralte (Jt. Secretary, MIZBA) ten 

an hruai a ni.