Japan Open champion Djokovic

Nimin tlai khan Japan Open khelh zawh a ni a, mipa tennis world number 1 Novak Djokovic chuan John Millman hnehin champion nomawi a chawi.

Kum 31 mi Djokovic hi hliam dam hlim a ni a, US Open hnua tournament a khelh lehna hmasa berah a hlawhtling nghal. Nomawi inchuhna inkhelah 6-3, 6-2 a hnehna changin tennis a khelh hun chhunga a title 76-na a la.

Serbian tlangval Djokovic hi Tokyo khawpuia inelna neihah hian a khel ṭha hle a, set hloh miah loin a khel tluan. World number 80 Millman hneh tur pawh hian darkar khat leh minute 20 bak a mamawh lo a ni.

Kum 32 mi Djokovic chuan, "Chawlhkar duhawm tak a ni, court chhungah nuam ti takin ka awm. Japanese mipuiten min dawngsawng ṭhain a boruak a nuam takzet, tuna ka khelh ang hian Sanghai-ah pawh khelh chhunzawm theih ka inbeisei," a ti.

Grand Slam pali an khel zo tawh a, tunlai hian Asia rama tennis inelna neih chhunzawm mek a ni. Tunkar chhung hian Sanghai Masters khelh zui leh a ni dawn, world number 2 Rafael Nadal chu ban rek hliam vangin a inhnukdawk.