Iran inkhel hmeichhiain en dawn

Kum 1979-a Islamic revolution hnu lawka hmeichhia ten mipa inkhel an en theih loh hnuah October 10 zan hian Iran hmeichhia ten football stadium-ah inkhel an en ve leh dawn ta. 

Ningani zan inkhelah hian Iran chuan Cambodia an mikhual dawn a, he inkhel tur atan hian hmeichhe pual ticket 3,500 zawrh chhuah a ni - minute reilote chhungin a zo nghal! Inkhelhna tur hmun Azadi Stadium hi mipui 78,000 lenna a ni a, mipui leng zat ngaihtuah chuan hmeichhe tana ticket zawrhchhuah hi a la bei tham viau tho. 

Thla hmasa lawk khan Iranian hmeichhia Sahar Khodayari chu mipa inkhel en a tum manchhuah a nih avangin a inhal a, a thi. Sahar-i club ṭan ber Esteqlal of Tehran jersey rawng chawia 'Blue Girl' tia hminglem an pek hi March khan inkhel en tumin mipa angin a insiam danglam a, manchhuah a ni. 

Ni thum chhung lung ina khung a nih hnuin bail-a chhuah lailawk a ni a, thla ruk chhung court hmaa inlan turin a nghak. Court-a inlan tura tih niah hian judge lamin rokhawlhna a neih avangin ṭhulh a ni a, thiam loh chantir a nih chuan thla ruk aṭanga kum hnih thleng lung in a tan theih tur thu mi sawi rik hre zuiin a inhal hlum a ni. 

FIFA chuan he thil thleng avang hian hma a la nghal a, Iran thuneitute chuan hmeichhe tan inkhel en an phal tawh tur thu an tiam niin an sawi. Football thuneitu sang ber pawl hian a tirah chuan ticket 4,600 zawrhchhuah a nih tur thu hrilh an nih thu an sawi a, Iran inkhelah hian FIFA aiawh tirin hmeichhia ten inkhel an en theih nana an hmalak dan an vil dawn a ni.