China Open-ah Osaka a thiam ber

Asia khawmualpuia tennis inelna ngaihhlut pakhat China Open hmeichhe singles final chu nimin tlai khan khelh zawh a ni. Naomi Osaka chuan world number 1 Ashleigh Barty chu 6-3, 3-6, 2-6 a hnehin champion nomawi a chawi.

Beijing khawpuiah Osaka hi a khel ṭha hle. Set khatna hloh mah se a hnuhnung pahnih chu a thunun viau, a khingpui service vawi thum chhuhsakin hlawhtlinna a chang.

World number 1 hlui Osaka hian Bianca Andreescu-i'n match 17 chhung hneh loh nei loa a kaltluang lai chu a tihtawp sak tawh bawk. Quarterfinal-ah Osaka hian 5-7, 6-3, 6-4 a hnehin, semifinal-ah Caroline Wozniacki chu  6-4, 6-2 in a hneh tawh bawk.

Grand Slam vawi hnih champion tawh Osaka hi season tir khan Australian Open-ah a champion a, a hnu lamah result ṭha a nei hleithei lo. US Open hnuah a coach nen pawh an inṭhen. Kar hmasa khan Japan Open-ah hlawhtlinna changin, tunah China Open-ah a chungnung ber leh ta a, atan chuan Asia khawmualpui hi a boruak a nuam rih hle.