MPL-ah Venghnuai an chak

Mizoram Premier League kai thar FC Venghnuai chuan Mizorama football league sang berah a vawi khat nan hnehna an chang a, Zirtawpni zan khan Ramhlun North FC 1-0 in an hneh. Rindika Hmar hote tan hian Lalruatfela chuan chakna goal a khung a, FC Venghnuai hian MPL8-ah hneh loh an la tawng lo.

FC Venghnuaiin tlarhmaah an innghahna Vanlalthanga an rawn dah a, top scorer ni tawh Laldampuia'n inkhel bul ṭan thei tawhin Isak Vanlalpeka'n midfield lai a rawn luah lum bawk. Tlarhnungah MPL match hmasa bera Aizawl FC nen inhmachhawn ṭuma hnawhchhuah Lalmuanawma (Munez-a) chhawr theih tawh mah se Lalhlimpuia leh Ruatfela te chu defence laiah inkawptir an ni.

Ramhlun North-in match hniha goal hnih khungtu Jessy Vanlalmuana chu tlarhmaah an rawn dah a, tawnhriat nei ṭha midfielder Lalmawizuala (Ashtea) chu bench-ah dah a ni thung. Inkhelh hma hian Ramhlun North-in point thum an hmu tawh a, Venghnuai erawhin match hnihah point hnih hmuin an intluk dawn tih a hriat nghal avangin goal a hlu dawn tih a hriat nghal.

Zirtawpni zan inkhel a hmuhnawm tawk lo a, chutihrualin inkhel a pawimawh avangin pressure erawh a sang hle. First half-ah goal a lut lo a, minute 56-naah Vanlalthanga freekick chu Lalruatfela'n a tauh lut. Venghnuaiin captain Lalhlima hoin goal venhim hna thawk chhunzawmin MPL-a a vawi khat nan hnehna an chan bakah clean sheet a nei a, coach Rindika Hmar tan result lawmawm a ni.

Ramhlun North erawhin goal an khung thei lo a, ball an chang tam zawk nachungin an goal bawh a na tawk lo. Ramhlun North hian I Day Football-a goal khata an hneh tawh loh Venghnuai lakah goal khat bawkin an tlawm a, set piece aṭanga goal an chhuah bawk avangin coach Jonathan Lalrintluanga'n (Thantea) MPL club a enkawl hmasak berah insiamṭhat ran a mamawh hle.

FC Venghnuaiin October 8, Thawhlehni tlaiah point la hmu lo Chawnpui FC an hmachhawn nghal dawn. Venghnuai ṭantuten an player langsar Dampuia ṭha lehzuala a chet ṭhat an beisei a rinawm a, coach Rindika Hmar erawh point thumah chauh a lungawi ang.

Ramhlun North hmabak a harsa dawn a, October 9, Nilaini tlaiah Aizawl FC laka tlawm Mizoram Police an hmachhawn dawn. MPL8-a Mizo player nei ṭha ber ang hiala sawi theih Police lakah Thantea leh a hoten fiahna an hmachhawn ang.