Spurs buaina a punlun zel

Brighton & Hove Albion-in Thawhṭanni zan khan Amex Stadium-ah Tottenham Hotspur chu 3-0 in an sawp. Mauricio Pochettino hote an mualpho a, an talbuai a, an buaina a punlun zel.

Premier League inkhel dangah Aston Villa-in anmahni ang bawka kai thar Norwich City chu 5-1 zetin an sawp. Burnley-in Everton 1-0 in an hneh a, Crystal Palace-in London Stadium luhchhuahin West Ham 2-1 in an hneh a, Watford leh Sheffield United-te goal awm loin an inhnehtawk.

Brighton & Hove-in minute thumna lekah goal an khung a, Pascal Gross-a cross chu Spurs keeper Hugo Lloris-a'n Neal Maupay tana goal khung nuam tawk lekin a ti per. 

France keeper hi a tlakna lamah a kiu ruh a pelh a, stretcher hmanga an zawnchhuah lai pawhin oxygen pek a ni. Lloris hi Paulo Gazzaniga-a'n a rawn thlak a, ani pawh hi minute 32-naa Connolly goal khungna kawngah a che ṭha bik lo.

Second half ṭantirhah Spurs rawn phur chho bawk mah se kum 19 mi Connolly bawk a rawn inlar a, Irish teenager hian mawi zetin minute 65-naah North London club beiseina a titawp.

Connolly hi Republic of Ireland squad-ah koh nghal a ni a, kum 19 leh ni 250 mi hi Brighton tana kum 20 hnuai lam Premier League-a inkhel bul ṭan thei hmasa ber a ni.

Seagulls forward Connolly chuan, "Awm dan pawh ka thiam lo, zan pawh ka mu thei lo ang," tiin a beisei phak baka bul a ṭan thu a sawi.

Tottenham hian League Cup-ah Colchester hneh loin an tla tawh a, Champions League-ah Bayern Munich lakah 7-2 in an mualpho. Premier League-ah Spurs an che chhe tho a; Newcastle United, Leicester City leh Brighton te an hneh tawh lo.

Spurs boss Mauricio Pochettino chuan, "Football-ah chuan chak chang leh chak loh chang a awm. Kan chak tluan avangin fak kan hlawh a, match hnuhnung pahnih erawh pawm a harsa. Kan dinhmun ṭha lo hi huai takin kan hmachhawn ang," tiin a sawi.

Argentine manager Poch hian ban a hlauh loh thu a sawi lang a, football expert leh media thuziak vangin a kalhmang a thlak loh tur a sawi bawk.