A chung berah Mizoram Police
Nimin tlai Mizoram Premier League inkhelah Mizoram Police-in Ramhlun North 4-1 in an lehthal a, Lalbiaksanga Colney hote hian point kua hmuin round 4 zawha hmahruaitu an ni.
Lammuala inkhelah hian Ramhlun North-in Lalremsiama hmangin an khung hmasa a, second half-ah Police coach BS-a Colney-in substitution awmze nei siamin F. Lalrinpuia (Valpuia) leh Lalsangbera te a luhtir.
Republic Veng tlangval Valpuia hian siphurh sutna goal a khung hnuah Dawrpui tlangval Sangbera'n goal hnih dang a khung belh a, hun tawp hmain Armed Veng tlangval Lalfakzuala'n chak nemnghehna goal penalty aṭangin a khung.
Risk la fuh
Ramhlun North-in Police hneh lo deuh mah se minute riatna leka Lalremsiama tauh luh hmangin hma an hruai. Police-in an nawr ngial a, Ramhlun North keeper Eddie Zorammawia a ding khawng ve tlat. BS-a Colney-in risk lain second half ṭantirhah Valpuia, Sangbera leh Lalbiakhlua (Biaktea) te a luhtir nghal. Police an ṭha zawk tih a lang a, an nawr bet vek.
Amaherawhchu, Sangbera'n penalty a hlah avangin chak lo thei dinmunah an ding a, Ramhlun North midfielder B. Lalhruailianthanga'n chance ṭha hlah avangin Police beiseina a nung zel. Minute 70-naah Police an vannei a, keeper Eddie-a ball thlauh chu Valpuia'n goal-ah a chantir. Hemi hnu hian Sangbera'n a tihsual thup nan mawi zetin minute 77-naah a pet goal a, minute nga hnuah Dawrpui tlangval hian a khung belh.
Hun tawp hma chiahin Police-in penalty an hmu leh a, captain Fakzuala'n a pet goal. Mizoram Police hian October 11, Zirtawpni tlaiah Electric Veng an hmachhawn dawn a, Lalsangzuala Hmar enkawl leh BS-a Colney hote inkhel tur hi en châkawm a ni.
Ramhlun North FC 1 - 4 Mizoram Police FC
RNFC : Lalremsiama 8'
MPFC : F. Lalrinpuia 70'; Lalsangbera 77', 82';
Lalfakzuala 90'
Mijia Enterprise MoM : R. Malsawmtluanga, MPFC