Villa-in thil danglam kan ti thei - Dean Smith

Aston Villa-in Inrinni zan khan Newcastle United an mikhual a, first half-a Ollie Watkins leh Bertrand Traore te goal hmangin 2-0 in hnehna an chang. Inkhelh banah Villa boss Dean Smith chuan thil danglam an tih theih thu a sawi.

Villa hi Covid-19 vangin an buai a, kum thar nia Manchester United an hmachhawn hnua league match hmasa berah Manchester City chu 2-0 in an hneh lo. Etihad Stadium-ah chak lo mah se Villa hi player pakua leh backroom staff panga ten Covid-19 an kai avanga inkhung hrang zo hlim an ni a, an khelh danah fak an hlawh hle.

December thla khan Villa hian match ngaah hneh loh an tawng lo a, Dean Smith hi manager of the month-ah an thlang. Amaherawhchu Villa hian match hnuhnung paliah vawi thum an chak lo a, vawi khat an inhnehtawk.

Chutihrualin Villa khingpui hi bihchian chuan an hneh loh hi Manchester khaw club pahnih leh Liverpool te an ni a, FA Cup-a Reds an hmachhawn ṭum phei chuan an youth team an khel hial. League-a point khat an hlawh chhuahna hi Chelsea  an ni bawk. 

Newcastle lakah hian Villa-in harsatna an tawk lo a, Watkins leh Traore ten first half-ah goal an khung. Tlarhnungah Tyrone Mings leh Ezri Konsa te inkawp an ding khawng a, Brazilian defender Douglas Luiz-a'n a thlawp ṭha a, harsatna an tawk lo.

Villa hi season thara European football khel thei turin an ṭha tawk tih a lang a, captain Jack Grealish chet danin club lian chil a ti put ṭhin hle. Hetihlai hian Newcastle United erawh match 19 aṭangin point 19 chiah an hmu a, 16-naah an awm avangin an insiamṭha rang lo a nih chuan tla ve thei an ni.