Benitez-a'n Chinese club a chhuahsan

Liverpool manager hlui Rafael Benitez chuan thla 18 hnuah Chinese Super League club Dalian Professional manager hna a thawh hnuah a chhuahsan. Kum 60 mi Spanish manager hian a contract-ah season khelh hmabak la awm mah se coronavirus vangin a coaching staff-te nen an contract neih lai hi an titawp.

Newcastle United, Liverpool leh Chelsea manager hlui Benitez chuan, "Vanduaithlak takin nikum ang thoin Covid-19 hian nasa takin kan nun leh kan tum a ti buai. Hri leng hian min la cham chilh reng a, hemi a nih avang hian kan chhungkua chu ka dah pawimawh hmasa ber a ni," tiin a sawi.

2020 Season khan Dalian Professional hi tla thei dinhmunah an ding a, relegation playoff an khelh hnuah an inhamtang thei hram. 

Benitez chuan, "Kalphung nghet ṭha chu kan hnutchhiah hmanah ka ngai a, inelna kalphung professional zawka a kal theih nan theihtawp kan chhuah a ni," tiin a sawi a, Chinese football-in hmabak êng tak a neih thu a sawi bawk. Kum 60 mi Benitez hi Scottish club Celtic nen sawi zawm a ni.