Mumbai lakah East Bengal an tlawm

Indian Super League-ah East Bengal an vannei hleithei lo a, league hmahruaitu Mumbai City lakah khel ṭha viau mah se a pawimawh ber goal an khung loh avangin 1-0 in an tlawm. 

East Bengal boss Robbie Fowler-a'n passing game khel ṭhin Mumbai City midfield chhu chat turin 4-2-3-1 formation a hmang a, Mumbai lakah 60% zet ball an chang thei hial.

Mahse, Kolkata club-in an khel ṭha chungin a pawimawh ber goal an khung thei lo a, minute 27-naa Mourtada Fall goal khung hmangin Mumbai club-in hnehna an chang.

Inrinni zan ISL inkhelah pawh chak zawk an awm lo a, Kerala Blasters leh FC Goa-te chu 1-1 in an inhnehtawk. Goan club tan Jorge Ortiz chuan minute 25-naah goal khungin a team hi hma a hruaipui. 

Mahse, Blasters tan Rahul KP chuan minute 57-naah si phurh a rawn sut a, minute 65-naah Goa defender Ivan Gonzalez chu hnawhchhuah a ni zui. 

Real Madrid academy aṭanga inzirchhuak Ivan hi Gary Hooper laka a foul avangin yellow card pek a ni a, referee laka a chet zui dan avangin hnawhchhuah a ni. 

Minute 80-naah Blasters tan K. Lalṭhathanga chu luhtir a ni a, a team chakpui theihna remchang a neih chu goal ruak deuthawah a chhuih lut thei lo thung. 

Mumbai keeper Naveen Kumar tihsual nangchingin Rahul KP chuan ball ṭha tak a nei a, hei hi Gary Hooper tan a siamsak - Celtic striker hlui hian shot se goal tawh mai tura ngaih a nih laiin Puitea pek a thlang a, Bethlehem Vengthlang tlangval hian goal-ah a chantir thei lo.