Champion Arsenal an tla

Premier League leh Champions League an beisei ngam loh pawhin 'FA Cup tal a la awm a lawm' tin chu Arsenal inhnemna a ni ṭhin. Tunah erawh an tournament khelh thiam berah champion lai hi fourth round paltlang zo loin an tla.

Inrinni zan St. Mary's Stadium a inkhelah Southampton chuan an mikhual Arsenal 1-0 in an hneh a, goal awmchhum hi Gunners defender Gabriel-a'n minute 24-naah an mahni lama a tih luh a ni. Gunners lamin tun hnai minute 508 chhunga an goal chhuah hmasak niin, match sarih hnua an tlawm lehna a ni bawk.

Mikel Arteta-a'n Arsenal tan player leh coach a nih hnuah FA Cup match 15 a hmachhawn tawh, chung zinga a tlawmna hmasa ber a ni. Manager a nih hnua a nomawi hmasa ber chu a hum thei dawn ta lo.

Inkhel hma media an hmachhawn laiin Arteta-a'n inelna an ngaih pawimawh thu leh, player ṭha an khelh tur thu a sawi lawk - Arsenal tan FA Cup hi ngaih pawimawh awm tak pawh a ni a, manager thusawi hi a mak hran lo.

Mahse, captain Pierre-Emerick Aubameyang leh tun hnaia khelṭha thei tak midfielder Emile Smith Rowe te chu squad-ah telh an ni lo. Bukayo Saka chu bench-ah dah niin, striker Alexandre Lacazette pawhin inkhel bul a ṭan lo.

Tun hnaia khel tam lo Gabriel chu tlarhnungah a rawn ding a, tlarhma lamah Nicolas Pepe, Willian leh Eddie Nketiah te an inkawp. Saints lam chuan chak tumin an ṭhat dan takin an inrem thung.

Mualneitu Southampton an khel nung zawk a, Walker-Peters-a cross Gabriel-a'n a tih luh bakah Che Adams khung tur chu ṭha takin keeper Bernd Leno-a'n a dansak. James Ward-Prowse pawhin hun ṭha nei mah se goal bar chungah a kal hlauh thung.

Hun chanve hma lamah Gunners-in goal hlauhawm an nei lo. Minute 67-naah Nketiah-a shot an dan pial chu goal zawnah kal ve mah se goalkeeper Fraser Forster tan hna harsa a ni phak lo, inkhelh chhung zawngin target-ah vawi hnih chiah an pet thei.

Danglamna thlen turin Saka leh Lacazette dahluh an nih hnuah pawh thawnthu a danglam thei lo, hnehna chan phu zawka khel Saints an chak. Fifth round-ah Premier League club Wolves an hmachhawn leh ang.

Southampton manager Ralph Hasenhuttl chuan, "Team pumpui kan khel ṭha, hun chanve hma lama inkhel kan thunun kha a tawp thlengin kan hlawkpui. Goal hnihna khung thei tur ni mah ila kan hlah a, Shane Long khan penalty hlawh thei a ni bawk," tiin a naute khelh danah a lungawi hle.

Arsenal manager Arteta chuan, "Inelna aṭanga tlak hi hi a pawiin a na hle. Hnehna chang turin kan khel ṭha tawk lo a ni," a ti. Aubameyang inlan loh chhan chu mimal thil a nih thu a sawi lang tel bawk. 

Team pahnih hi Thawhlehni zan hian a hmun ngaiah league match khel turin an inhmachhawn zui dawn. Saints lam hi match khata khel tlem chungin point hnihin an sang zawk, season thara European football khelh an duh a nih chuan Arteta naute tan chak ngei ngei a ngai tawh.