PSG an chak chiang

Paris St-Germain chuan manager thar Mauricio Pochettino hnuaiah hma an sawn zel dawn niin a lang. Zirtawpni khan an mikhual Montpellier chu 4-0 a sawpin Ligue 1 table chung berah an dinhmun an sawhnghet.

French champion tan hian Kylian Mbappe chuan goal hnih a khung bakah PSG tana match 100-na kheltu Neymar leh Mauro Icardi ten goal khat ve ve an khung. France international Mbappe-a'n Neymar goal tur a siamsak a, Mbappe goal hnihna chu Icardi siamsak a ni ve thung.

Poch-a naute hian Ligue 1 match 21 an khelh aṭanga point 45 hmuin a chung berah an awm, pahnihna Lille aia an sanna chu point thum chauh a ni thung. Nizan khan Lille hian Rennes an lenchilh a, an chak chuan Paris club point hmuh zat an hmu dawn.

Neymar-a'n club tana mellung pawimawh a phun zanah goal a khung a, Barcelona forward hlui hian PSG tan goal 81 a khung tlin tawh bakah a ṭhiante khung tur vawi 41 zet a siamsak tawh bawk - player manto ber a nihna chu thil tih hmangin a lantir.