Curry-a 3-points a tawk zo lo
Stephen Curry-a'n nimin zing khan NBA sulhnu ropui hnutchhiah mah se Golden State Warriors tan a tawk zo lo a, an khingpui Utah Jazz lakah 127-108 in an tlawm.
Jazz lakah Curry hian three-pointers vawi nga a nei a, basketball inelna sang berah 3-points a neih tawh belhkhawm chu vawi 2562 zet a ni. 3-points neih tam lamah GSW thiampuipa chungah hian Ray Allen (2973) chauh a awm ta.
Nimin zing inkhel dangah Los Angeles Lakers chuan Chicago Bulls 101-90 in an luhchhuah. NBA champion Lakers hian tun season kal laiah khualmuala match kua an khelh aṭangin hnehna an la chang vek.
Lakers tan hian Anthony Davis-a'n point 37 a nei a, an thiampuipa LeBron James chuan point 17 bakah rebound vawi 11 lain double-double a ni. Nikum lama an champion theihna player pahnih hi an la ṭangkai chhunzawm zel.
Eastern Conference hmahruaitu Philadelphia 76ers, Brooklyn Nets, Houston Rockets, Denver Nuggets leh Minnesota Timberwolves te pawhin hnehna an chang bawk.
Nimin NBA Results
Golden State Warriors 108 - 127 Utah Jazz
Los Angeles Lakers 101 - 90 Chicago Bulls
Philadelphia 76ers 114 - 110 Detroit Pistons
Miami Heat 124 - 128 Brooklyn Nets
Houston Rockets 133 - 108 Dallas Mavericks
Denver Nuggets 120 - 112 Phoenix Suns
Minnesota Timberwolves 120 - 110 New Orleans Pelicans