Eden Hazard a lo kir leh ta!

Real Madrid tan Eden Hazard a lo kir leh ta - Inrinni zan khan goal a khung bakah assist a nei bawk a, Real chu khualmualah hnehna a chanpui. 

Tun hnaia result nei ṭha thei lo Real hian khualmualah Alaves chu 4-1 in an sawp a, Karim Benzema chuan goal hnih khungin Eden Hazard leh Casemiro-ten goal khat ve ve an khung bawk. 

Alaves tan Joselu chuan goal khat khung ve bawk mah se scoreline chei mawitu chauh a ni a, Real-in champion beiseina an neih thi ṭep tawh chu an chhi nung thar ve leh ta. 

Nizanah Real elpui ber Barcelona leh Atletico Madrid an inlan a, he thu buatsaih a nih lai hian result erawh kan hre hman lo. 

Tun hnaia Spanish media-te chaw tui ber chu Real Madrid boss Zinedine Zidane ban a nih dawn leh dawn loh chungchang a ni a, hei hian Real dinhmun thui takin a hrilhfiah. 

Real hian La Liga-a an match hnuhnnung pathumah vawi khat chiah chak an nei a, vawi hnih an khingpui an inhnehtawkpui. Spanish Super Cup semifinal aṭangin Athletic Bilbao-in an hnawt chhuak bawk a, hei thleng hi chu a la ngaihdam theih.

Mahse, Copa del Rey round of 32 aṭangin third division club Alcoyano chuan player kim loa hun tawp hmang chungin Real hi an hnawt chhuak a, hei zet chuan Real thuneitute a nghawr nghing. 

Zidane-a tan a hna hum tura tih tur hmasa chu Alaves hneh a ni a, French manager vanduai a kaltluang - Alaves an lenchilh hma hian Zidane-a'n Covid-19 a kai tih hmuhchhuah a ni a, an mikhualna ramah a naute a ho thei lo. 

Zidane tel loin Real an inlan a, an pu tel loh lang lo khawpin an khel - minute 15-na lekah Casemiro chuan goal hmahruai a khung nghal a, Karim Benzema leh Eden Hazard-ten first half tawp hmain an belhchhah ve leh bawk. 

Chawlhlawk hman a nihin Real hian 3-0 in hma an hruai tawh a, chak tur a chiang tawhah a ngaih theih. Minute 59-naah Alaves an rawn lang ve zawk a, Joselu chuan inkhel a la tawp lo tih pholangin si phurh a rawn sut ṭhen. 

Mahse, Alaves tan Real an 'u' hret a, minute 70-naah Benzema chuan a goal hnihna a rawn khung ve leh - hun tawp thlengin goal dang a lut tawh lo a, 4-1 in Real an chak. 

Real Madrid-in hnehna an chan avangin table-a pahnihna dinhmun chu an sawhngheta, an hnuai chiahah 3-0 a Cadiz hnehtu Sevilla an awm - nizan inkhelah Barca-in hnehna an chan chuan Sevilla lehpelin pathumna an ni lehnghal ang. 

Cristiano Ronaldo hmun ruak luah tur ang hiala mi tam takin an ngaih Eden Hazard-a'n Real-ah beisei angin a khel chhuak thei lo a, Chelsea tana Hazard leh Real tana Hazard chu tun dinhmunah chuan inthlau tak an ni. 

Belgian forward hi hliamin a tlakbuak ve reng bawk avangin a vanduai tih pawhin a sawi tel theih a, chutihrual chuan chhuanlam atana hman reng erawh a rem lo - season hmasa khan Real tan inelna hrang hrangah match 22 khelin goal khat chiah a khung a, assist vawi sarih a nei thung. 

Tun season-ah Hazard tan thawnthu a danglam tam lo a, Alaves laka a goal hi November 25-a Champions League match-a Inter Milan laka goal a khung hnua club tana a khung leh hmasak ber a ni a, La Liga bikah chuan October 31 hnua Real tana goal a khung leh hmasak ber a ni!

Kum 30 mi ni ve tawh Hazard hian tun season-ah Real tan inelna hrang hrangah match 12 khelin goal thum a khungsak a, assist vawi khat chiah a la nei - Alaves laka a chet ṭhat chhunzawm turin fan-ten an beisei ang.