Mary Kom tan medal a chiang

World champion vawi ruk ni tawh MC Mary Kom chuan khawvela boxer ṭha berte zinga mi a nih zia a pholang leh a, nimin khan Valencia Victoria hnehin AIBA Women's Boxing World Championships-ah semifinal a inhlangkai.

India boxer chuanvawr hian flyweight (51kg) huangah Colombia nula hi unanimous decision (5-0) in a hneh. Semifinal a thlen avang hian a chhe berah pawh bronze medal tal a dawng phak dawn tih a chiang tawh a ni.

Semifinal-ah chuan Kom tan hna a hautak tawh dawn. Inrinnia a hmachhawn leh tur Turkish boxer Busenaz Cakiroglu hi European Championships leh European Games gold medalist nilai a ni. Ani hian quarterfinal-ah China nula Cai Zongju a hneh ve thung.

Kum 36 mi Kom chuan, "Quarterfinal-a hnehna ka chan avangin ka lawm hle, kan ram tan a sang thei ang ber thlen ka tum dawn. Final lut ngei turin semifinal-ah chuan ka theihna zawng zawng ka chhuah dawn a ni," a ti.

Colombia nula nen an inkhel chungchang sawi zuiin Kom chuan, "Ka match hmasa nena khaikhin chuan a awlsam zawk. Victoria kha a ṭhat tawk lohna lai leh min rawn beih a tum dan ka hrethiam vat a, ka tan beih let a awlsam phah," tiin a sawi.

Manipuri boxer hian world title ringawt pawh paruk a lak tawh bakah hian sulhnu ropui a ngah hle. Asia huapah vawi nga a champion tawh a, Commonwealth Games-ah pawh a chungnung ber a ni tawh bawk.