Hmahruaitu Milan an chak lo

January 23, Inrinnia Vanglai chhuakah AC Milan tan Atalanta chu fiahna an nih tur thu leh, chetsual theihna an nih zia ziahlan a ni. Team pahnih hi Inrinni zan khan an intawng a, hmahruaitu Milan hi 3-0 in an mualpho.

San Siro a inkhelah mikhual Atalanta tan Cristian Romero, Josip Ilicic leh Duvan Zapata ten goal khat ṭheuh an khung. Zlatan Ibrahimovic leh Mario Mandzukic te awmna Milan lamin a chhanletna an nei lo.

Chak lo mah se Milan hi Serie A table chung berah an la awm. Anmahni hnaih bertu Inter Milan chu an mikhualna ramah Udinese nen goal awm loin an inhnehtawk a, manager Antonio Conte naute hian point hnihin an la phak lo a ni.

Tun hnai Serie A season hnuhnung pahnihah Atalanta hi goal khung hnem ber an ni a, huaisen taka attaching game an khelh ṭhin avangin league mai bakah Champions League-ah pawh team hmuhnawm an ni phak.

Milan mualah pawh Gian Piero Gasperini enkawl team hi an zam lo. Minute 26-na lekah Robin Gosens-a cross chu Romero chuan a tauhlut nghal a, second half tir lamah Franck Kessie-a'n Ilicic a tih tluk vangin penalty a chawi - penalty hlawhtu Ilicic hian an goal hnih nan a khung.

Goal hnih an phurh hnuah Milan lamin sut ngei an la tum. Ibra kawppui turin Juventus striker hlui, tun hnaia an lak thar Mandzukic an dah lut. Mahse, Atalanta bawkin goal an neih leh tak avangin Stefano Pioli naute an tho chhuak thei ta lo.

Tun season Serie A match 19 an khelh chinah Milan hi a vawi hnih nan an tlawm, champion Juventus lakah an chak lo tawh bawk. Manager Pioli chuan nomawi chawi tur chuan an ṭhat lohna lai inenfiah an ngaih thu a sawi.

Pioli chuan, "Ka hmuh dan diktakah chuan Atalanta chauh hi chiang taka kan ngam loh awmchhun an ni. Kawng engkimah khan keini aiin an tih fuh zawk vek. Inkhel bul ṭan fuh mah ila hun ṭha neih kan chawr ṭangkai thei lo, anni lam chuan an hlah lo thung," a ti.

Atalanta manager Gasperini chuan, "Milan ṭhatna lai kan hria a, chumi chhuchat tura ruahmanna kan siam a hlawhtlin avangin a lawmawm hle," a ti. Point 36 hmuin palinaah an awm a, hmahruaitu Milan an phak lohna erawh point sarih a la ni thung.