Madrid chungchangah Bale a buai lo

Welsh forward Gareth Bale chu Real Madrid chhuahsan tur angin sawi ni mah se thuthang leng vel chuan a tih buai loh thu a sawi a, "Theihtawp chhuaha khelh zel hi ka tum chu a ni mai," tiin a sawi. 

Bale hi Spanish media-te chuan Champions League-a Club Brugge an tum ṭuma squad-a a tel loh avangin a thinrim niin an sawi a, Bale hian tlai taka stadium a pan lai video thlengin an tarlang. Mahse, Bale chuan, "Rilru leh ngaihtuahna zawng zawng nen kan khel a, chutiang a nih chuan khelmual chhungah pawh thinrimna tih lan chang a awm tur a lawm. Nuamti taka football khelh ka tum mai a ni," a ti. 

July khan Real manager Zinedine Zidane chuan Bale-a'n Santiago Bernabeu-a chhuahsan vat a beisei thu a sawi a, Bale-a agent Jonathan Barnett chuan, "Zidane hi mi zahpuiawm tak a ni. Real tana hna tam tak lo thawk tawhtu chungah zahna pakhatmah a lantir lo," tiin a lo chhanglet tawh. 

Bale hian tun season-ah Real tan match sarih a khel tawh a, goal hnih khungin assist vawi hnih a nei.