Tlai dar 4-ah Police leh Electric Veng

11th October, 2019

Mizoram Premier League Season 8-a inkhel hmuhnawm tur hi thur chhuak dawn ta ila, Mizoram Police leh Electric Veng hi a tel ngei ang. Vawiin tlai dar 4:00 hian team ṭha pahnih hi Lammualah an inhmachhawn dawn. Zanin dar 7:00-ah Chhinga Veng leh Ramhlun North te an inkhel bawk ang.

Police hi Lalbiaksanga Colney-in a enkawl a, Lalsangzuala Hmar-in Electric Veng a kaihruai thung. MFA Super Cup champion Police hian squad nei chhah zawk nachungin an inkhel tur hi coach ṭha inelna a ni thei bawk ang.

BS-a Colney chuan, "Electric Veng nena kan inkhel tur kan thlir tel avangin Ramhlun North lakah player ṭha ṭhenkhat kan awltir a, tun ṭuma kan inkhelh turah erawh a tir aṭangin kan ṭhat dan berin an lut nghal dawn," tiin Vanglaini a hrilh.

Police hian Ramhlun North laka goal an chhuah hnuah substitute aṭangin F. Lalrinpuia, Lalsangbera leh Lalbiakhlua te second half ṭantirhah an luhtir a, BS-a Colney-in risk la fuhin goal li lai an khung. Electric Veng coach Sanga chuan, "Police-in Ramhlun North lakah goal li an khung a, keiniin Chhinga Veng lakah goal khat kan khung. Hetah hian kan inthlauhzia chu a lang nghal a, kan tlarhmaten goal khung an harsat. Chak kan duh si a nih chuan kan defender-ten goal an khung a ngai ang," tiin Vanglaini a hrilh.

MPL8-ah Electric Veng hian goal nga an khung tawh a, player pali David Lalchhuanawma, PC Laldinpuia, Ramhlunchhunga leh Vanlalremkima ten goal an khung a, goal khat dang hi an khingpuite tih goal sak a ni. Coach Sanga'n goal khung thei player an mamawhah a ngai a, chutihrualin Salem Veng tlangval David-a'n season liam ta khan goal ruk a khung tih hriat a ṭha. Electric Veng khingpui tur Police hian match liah goal kua zet khung mah se goal nga an chhuah a, an tlarhnung a phui lo. Coach BS-a Colney-in I Day Football group stage-a 2-1 an hneh tawh Electric Veng lakah an tlarhnung phui ṭha zawk hmuh a duh ang.

Zan lama inkhel tur Chhinga Veng coach Anand Gurung chuan, "Ramhlun North-in Police lakah goal an khung hmasa tih kan hria a, kan fimkhur a ṭul. MPL-ah team chhia an awm lo a, Electric Veng kan hneh zawh chiah vanga kan inthlahdah a nih chuan a tuar tur chu keimah kan ni," tiin Vanglaini a hrilh.