India-in bul an ṭan ṭha

Nimin tlai khan India leh South Africa chuan Maharashtra Cricket Association Stadium-ah Test match vawi hnihna an khel a, ni khatnaah run 273 siamin wicket thum chauh an hloh.

Test match vawi khatnaah India an chak a, nimina khelh ṭan second Test-ah Virat Kohli hote hi ṭhumvawrah chakin bat hmasak an thlang. Opener Rohit Sharma-a'n run 14 chauh siamin che ṭha tawk lo mah se a bul ṭanpui Mayank Agarwal-a'n century (108) a siam a, Cheteshwar Pujara pawhin run 58 a siam ve bawk.

Vawiin chawhma dar 9:30 hian inelna hi ṭan a ni leh dawn a, run 63 siam tawh Kohli leh Ajinkya Rahane (18*) ten bul an ṭan ang. Proteas bowler zingah Kagiso Rabada a che ṭha a, run 48 pein wicket thum hi a lak vek a ni.