US aia Japan thlangtu Osaka

Naomi Osaka chuan ram tana a inlan theihna tur a thlang fel. World number 1 hlui hian a sei lenna United States ai chuan a pianna ram Japan tana khelh a duh, nakkuma Tokyo Olympics neih hunah khawtual mi nichungin a inlan thei ang.

Grand Slam vawi hnih champion tawh Osaka hi October 16, 1997 khan Japan khawpui pakhat Osaka-ah a piang - kum thum mi chauh a nih laiin United States lamah an pem a, a duh a nih chuan US khua leh tui nihna a nei chhunzawm thei a ni.

Osaka hian karleh Nilaini hian kum 22 a tling dawn. Khua leh tui nihna nei kawp (dual citizenship) hian kum 22 an nih hmain ram tana an inlanna tur an thlan fel a ngai a ni. Japanese nu leh Haitian pa laka piang Osaka chuan, "Japan tana Olympic khel thei tura hun ṭha a awm chu a lawmawmin a hlu takzet. Kan ram tan hnuhma ṭha neih ka duh a, fanu chhuanawm tak ni thei turin theihtawp ka chhuah ang," a ti.

Season hmasa khan Osaka hian Serena Williams hnehin US Open nomawi a chawi a, Japanese player zingah Grand Slam champion thei hmasa ber niin kumin Janauary thla khan Australian Open-ah a champion leh bawk.