Usyk hmachhawn tur a chiang tawh

Oleksandr Usyk chu Tyrone Spong nen inhnek tura tih ni mah se Spong hian damdawi hman phal loh a lo hman avangin enchhinna a paltlang zo lo a, Usyk hmaa ding turin kum 38 mi Chazz Witherspoon thlan zui a ni. 

Kum 32 mi Usyk hian nikum khan Tony Bellew lakah WBA (Super), WBC, IBF leh WBO world cruiserweight title a kawl lai chu a humhim a, hemi hnuah hian ring chhungah a inlan leh tawh rih lo. Spong-a'n test a paltlang zawh tak lohah chuan October 12 inhnek tur atan Witherspoon-a'n ni li chiah inbuatsaihna hun a nei a, mahse a zam lo. 

Vawi 41 inhnek a hmachhawna vawi 38 chak tawh Chazz Witherspoon chuan, "Ka tan chuan hun duhawm tak a ni a, fight ropui hmachhawn turin ka inbuatsaih a ni," a ti. Kum 38 mi fighter chuan a inrintawk thu sawi zuiin, "Usyk hian heavyweight boxing a rawn  khel dawn a ni a, a danglamzia a hria ang. Fight ka hmachhawn hnuhnung pariatah hnehna ka chang vek a, tun ang hun duhawm nghak hian hun ka hmang ṭhin," a ti a, a zam lo.