Dortmund, Leverkusen leh Leipzig chak lo

Bundesliga-ah Bayern Munich elpui Borussia Dortmund, Bayer Leverkusen leh RB Leipzig te Inrinni zan khan an chak lo vek a, nizana inlan champion lai Bavarians tan nomawi humhim a harsa hran dawn lo niin a lang.

Borussia Park-ah Borussia Dortmund an lenglut a, Erling Braut Haaland-a'n goal hnih khung mah se Borussia Monchengladbach-in 4-2 in hnehna an chang. Glabach-in Nico Elvedi hmangin minute 11-naah hma ang hruai a, Dortmund-in minute  22 leh 28-naa Haaland-a goal hmangin an chhanglet. Amaherawhchu mualneitu Gladach hian minute 32-naah Elvedi hmangin an sut a, second half-ah Ramy Bensebaini leh Marcus Thuram ten an khung belh.

Dortmund goal hnih siamsaktu Jadon Sancho chuan, "Theihtawp kan la chhuah zel dawn," tiin a sawi a, captain Marcos Reus-a'n tlarhnung an chesual leh ṭhin chu a dem thung. Reus chuan, "Kan insiamṭha vat lo a nih chuan a harsa  dawn. Tihsual ngai bawk kan tisual leh ṭhin a ni," tiin a sawi.

December thla laihawl khan Dortmund-in an coach Lucien Favre an ban a, kai thar Stuggart 5-1 zeta an hneh loh avangin thutlukna hi an siam a ni ber. Manager Favre hnuaia mi (assistant) Edin Terzic chu manager lailawk turin an ruat a, result ṭha an nei chuang lo. Match riat an khelh tawhah vawi li chakin vawi thum an chak lo a, vawi khat an inhnehtawk.

Champions League aṭanga Manchester United petthlatu RB Leipzig-in relegation zone-a awm Mainz chu 3-2 in an hneh lo a, result mak a ni. Leipzig tan hian American midfielder kum 21 mi Tyler Adams chuan Bundesliga goal hmasa ber leh goal hmahruai a khung a, point hlawhchhuah nan a tawk lo.

Wolfsburg-in Bayer Leverkusen an mikhual a, Ridle Baku goal hmangin 1-0 in an chak. Wolfsburg hian hnehna an chan avangin point 32 an hmu a, table-ah palinaah awmin an chung chiaha awm Leverkusen nen an point hmuh zat a inang chiah.