England tan vawi khat chak a tawk

Mizote ngaihven England football team chuan zanin dar 12:15 hian Euro 2020 qualifier an khel dawn a, Czech Republic khelmualah an lut dawn. 

England hian match li an khelh tawhah hnehna an chan vek avangin an hmabak a êng a, Czech khelmualah hnehna an chang thei a nih chuan Euro 2020 khel turin an tling chiang tawh ang. Leicester midfielder James Maddison chu damlohna vangin nimin tlai khan a inhnukdawk. Kum 22 mi English midfielder hian ram tana a match hmasa ber khel turin a nghah leh rih a ngai dawn a ni.

England hian group A-ah point 12 neiin hma an hruai mek a, zanina an hmachhawn tur Czech hi an hnuai chiahah awmin point kua an nei. Three Lions hian hnehna an chan chuan Czech hi point ruk ngawtin an tlansan dawn tihna a ni. 

Three Lions hian Czech aiin match khatin an khel tlem zawk a, head-to-head ah an chungnung zawk dawn bawk - chumi a nih chuan match hnih chiah khelh tur nei. Czech-in England an umpha tawh dawn lo tihna a ni a, England an tlang ang. 

England-in qualifier-a an match hnuhnung berah 5-3 in Kosovo an hneh a, Gareth Southgate-a tana thlir tur chu goal nga an khung lam aiin goal thum an chhuah kha a ni. Kosovo laka bul ṭan pahnih Everton defender Michael Keane leh Manchester United defender Harry Maguire ten holam takin goal leh penalty an chawi a, England buaina chu a thlak tur lam an vai tlat!

Khawvela defender manto ber Maguire hi chuan bul a ṭan leh tho a rinawm a, a kawppui tur lam hi buaina chu a ni. Ṭum dang ni se Joe Gomez chu lut tur chiang a ni a, mahse tun hnaiah Liverpool tan a inlan phak lo a, a inlan chhunah a ti chhe hle bawk. 

Mual sira tlarhnung veng tur chuan Trent Alexander-Arnold, Kieran Trippier leh Danny Rose duhthlan tur an awm a, a laiah hian rawlthar Fikayo Tomori a lut mai ang em? Zaninah kan hria ang. 

Liverpool right back Trent Alexander-Arnold chu tlarhnunga an buaina hrechiangtu zinga mi a ni a, rawlthar ṭhangduang chuan Euro 2020-ah thlen thui an tum a nih chuan tlarhnung insiamṭhat a ṭul thu a sawi. Arnold chuan, "Heti zat goal chhuah chuan a thlen thui theih loh. Hmasawn kan ngaihna lai leh theihtawp chhuah kan ngaihna lai chu kan hria a ni," a ti a, insiamṭhat an tum tih a lang. 

Duhthlan theih ni ta se England tlarhma tluka duhthlan tur an awm chuang lo a, Gareth Southgate-a'n Tammy Abraham, Harry Kane, Marcus Rashford, Jadon Sancho, Raheem Sterling leh Callum Wilson a nei. Euro qualifier match li leka goal 19 khung tawh an nih avangin eng team tan mah Three Lions tlarhma hi namnul chi an ni lo tih a hriat a, Czech lakah goal an khung nual a nih pawhin a mak lo ang. 

England hian Aston Villa goalkeeper inhliam Tom Heaton hmun ruak luah turin Sheffield United goalkeeper Dean Henderson an ko a, England squad-a koh a nih hmasak ber a ni. Kum 22 mi goalkeeper hi Manchester United player ni mah se Blades (Sheffield United sawina)-ah hian loan-in a khel mek a, England Under 21 tan chuan vawi 11 a lo inlan tawh. 

Goalkeepers: Dean Henderson (Sheffield United), Jordan Pickford (Everton), Nick Pope (Burnley)

Defenders: Trent Alexander-Arnold (Liverpool), Ben Chilwell (Leicester), Joe Gomez (Liverpool), Michael Keane (Everton), Harry Maguire (Manchester United), Tyrone Mings (Aston Villa), Danny Rose (Tottenham), Fikayo Tomori (Chelsea), Kieran Trippier (Atletico Madrid)

Midfielders: Ross Barkley (Chelsea), Jordan Henderson (Liverpool), James Maddison (Leicester), Mason Mount (Chelsea), Declan Rice (West Ham), Harry Winks (Tottenham)

Forwards: Tammy Abraham (Chelsea), Harry Kane (Tottenham), Marcus Rashford (Manchester United), Jadon Sancho (Borussia Dortmund), Raheem Sterling (Manchester City), Callum Wilson (Bournemouth).