Goal khung hnaa neitu Haaland

Borussia Dortmund-in goal khung tura an lakluh Erling Braut Haaland-a'n a hna a la tlin chhunzawm zel a, Thawhlehni zana German club-in Paris St-Germain 2-1 a an hneh ṭumin goal hnih a khung.

UEFA Champions League last 16 first leg-ah hian PSG tan Neymar-a'n goal khat khungin 'away goal' hlu tak tiin a sawi theih a, March 11-a second leg khelh a nih hnuah quarterfinal lut tur chinfel a ni ang. Tun dinhmunah erawh inkhel result ai maha sawi hlawh zawk chu Norwegian rawlthar Haaland-a goal khung theihzia a ni.

PSG-in Ligue 1 an thunun a, an duh chu Champions League a ni a. French champion hian an duh puitlin turin sum pawh an hmang nasa a, tuna an manager Thomas Tuchel pawh hi Borussia Dortmund aṭangin an la lut.

German club hi buk rit lo hret mah se ṭan phat aṭangin an goal bawh a na zawk a, group stage-a Barcelona an khelh ṭum ang thoin inkhel an thunun a, goal chance pawh an ngah. First half-ah Jadon Sancho chu player hmuhnawm ber a ni a, goal khung erawh an harsat. Second half-ah Erling Braut Haaland-a'n goal hnih a khung a, Dortmund tan danglamna thlentu a ni.

Minute 69-naah awmna tur hmun taka awm Haaland-a'n ball per nang fuh hmasa berin Dortmund goal hmahruai a khung. PSG-in minute 75-naah an chhang let nghal a, Kylian Mbappe siam chu Neymar-a'n a khung a, French club-in player theihna nei sang an kawl tih a lang.

Amaherawhchu, khawvel player manto ber Neymar bakah player langsar dang Mbappe leh Angel di Maria te inlan zanah Haaland a langsar ber. Norwegian forward hian minute 77-naah box pawn aṭangin chakna goal mawi zetin a khung.

Lucien Favre hoten Signal Iduna Park anga an khel nawn thei a nih chuan PSG hneh thei turin an ṭha tawk a, chutihrualin Thomas Tuchel enkawl PSG hi an squad aṭanga thlir chuan last 16-a tla tura dah an harsa hle.

Kum 19 mi Erling Braut Haaland hian goal 39 a khung tawh a, hattrick vawi ruk a siam tawh. Dortmund tan ringawt pawh match sarih lekah goal 11 a khung a, tun season Champions League khelh mekah German club leh Red Bull Salzburg tan goal 10 a khung.

Haaland-a thil tih hi Mbappe chauh pawh ni loin khawvel player ropui ber pahnih Cristiano Ronaldo leh Lionel Messi te pawhin kum 19 an nih laia an tih theih loh a ni. Norwegian striker hian January thla khan Dortmund hi a zawm a, German club tana goal 11 khung tur hian minute 450 chauh mamawhin minute 41 danah goal a khung.

Bundesliga-ah Haaland hian match nga chauh a la khel chungin league-ah amah aia khung tam 11 chiah an awm tawh. Goal a khung theih em avangin January thla khan darkar khat chauh khelin Bundesliga player of the month-ah an thlang.

PSG an hneh ṭuma man of the match-a thlan Haaland chuan, "Man of the match ka dawn avangin ka lawm a, chutihrualin tun ai khan ka la khel ṭha theiin ka inhria. First leg-ah chak mah ila, PSG an ṭhat avangin kan dinhmun a him lo," tiin hmasawn theih a inbeisei rualin PSG hneh a la harsat tur thu a sawi tel.

Season ṭantirh khan Haaland hi Salzburg tana khelin goal riat a khung a, hetih hunlai hian goal khung tam ber dawttu a ni. Tun dinhmunah goal 10 khung tawhin Haaland aia khung tam an awm lo a, Bayern striker Robert Lewandowski nen an goal khung zat a inang. 

Tun hmain Champions League-ah team pahnih tan khelh theih a ni lo a, tun hnuaah erawh club pahnih tan Europe inelna sang berah a khelh theih tawh a ni.