Rio Open-ah Thiem a chak

Dominic Thiem chuan Australian Open final a khelh hnua a match hmasa ber a khel leh a, Thawhlehni zan khan a khingpui Felipe Meligeni Alves hnehin Rio Open last 16 a inhlangkai.

Quadra Guga Kuerten-a inkhelah Thiem hian awlsam takin hnehna a chang mai bik lo, wildcard hmanga inlan Alves hi 6-2, 4-6, 6-1 in a hneh, zanin hian Jaume Munar nen quarterfinal luh inchuhin an intawng zui leh nghal ang.

Brazil rama ATP 500 event neihah hian 2017 khan Thiem hi a champion tawh, kuminah hian seeded pakhatna pek niin nomawi chawi tura rinkai ber a ni. Alves nen an inhmachhawn ṭum hian break point vawi riat a hmuh zinga pali chu a chhawr ṭangkai.

Inkhel dangah Borna Coric pawh a chak, season kal laiah Coric hi match li a khelh hmasak hoah a tlawm vek - tun ṭumah erawh rinkai ni lo mah se a khingpui Juan Ignacio Londero chu 7-6 (7-5), 7-5 in a hneh.