Police ngamtu Electric Veng

Mizoram Premier League Season 8-a champion rinkai Mizoram Police chu Electric Vengin 2-1 in an hneh a, Lalbiaksanga Colney lakah Lalsangzuala Hmar a chungnung.

Nimin tlai Lammual inkhelah Electric Veng tan Vanlallawmtluanga'n minute 46-naah goal hmahruai a khung a, Police-in R. Malsawmtluanga hmangin minute 59-naah an sut. Police chungnung chhunzawm mah se Dilkawn tlangval Tluangtea'n minute 72-naah chakna goal a khung.

Mizoram Police-in match nga khelh aṭangin vawi hnih chak loh an nei a, an tiatpui tura ngaih Aizawl FC leh Electric Veng lakah an chak lo ve ve. Electric Veng nen hian Police an khel chhe lo a, goal chance ngah mah se goal khung an harsat. Police coach BS-a Colney chuan, "Chak loh chang chu a awm thei a ni a, chutihrualin kan zir angin set piece-ah ka nauten an pet lo," tiin an zir anga an khelh chhuah loh avanga a lawm loh thu a sawi. 

Electric Vengin coach Sanga hnuaiah hma an sawn zel tih a lang a, Chhinga Veng laka an chak loh hnuah an harchhuak lehnghal. Hnehna an chan theih nan Tluangtea a che ṭha a, goal hnih khung turin awmna hmun takah a awm ve ve.

Coach Sanga chuan, "Hnehna kan chang hi ka lawm. Chutihrualin kan inkhelh hma khan Lalbiaktluanga thih thu kan hria a, MPL-a goal khung hmasa ber hi Electric Veng ṭantu ruhkawl ni bawkin Police kan hnehna hi Biaka tan hian kan hlan a ni," tiin a sawi.