A tawpah Netherlands dingchang

Euro 2020 qualifying round-ah Netherlands-in Ningani zan khan Northern Ireland chu minute 10 a la awm tihin an lehthal a, Feyenoord Stadium-ah 3-1 in hnehna an chang.

Group C-ah Nether-lands, Germany leh Northern Ireland ten point 12 vek an hmu a, Euro 2020 khel tur team pahnih hriatthiam a la har. Northern Ireland hian hun rei tak hmahruai mah se an match hnuhnung pahnihah an elpui Netherlands leh Germany an hneh loh avangin point inangah pathumnaah an tla thla.

Netherlands-in inkhel an thunun vek a, statistics pawhin nemnghetin ball possession 77% an nei pha hial. Amaherawhchu goal a pawimawh a, Northern Ireland substitute Josh Magennis chuan minute 75-naah Matthijs de Ligt venna kar aṭangin a tauh lut.

Northern Ireland hian an goal neihna chiah hi goal zawnah an pet thei a, mahse minute 15 chiah a awm tawh avangin Netherlands an hlauthawng hle. Euro 1988 champion hian Euro 2016 leh 2018 World Cup final round an thleng zo tawh lo.

Minute 80-naah Donyell Malen-a through ball chu Memphis Depay-a'n um lutin Netherlands siphurh a sut. PSV forward Malen hian hun ṭha hlah zui mah se  substitute Luuk de Jong-a'n injury time-ah chakna goal a khung. Minute thum hnuah Frenkie de Jong pass chu Depay-a'n chak nemngheh nan a hmang.

Northern Ireland manager Michael O'Neil chuan, "Kan chak loh dan hi na kan ti takzet. Hma kan hruai theih nan kan theihna zawng zawng kan chhuah a, hun rei tak kan chelh. Injury time-a goal hnih kha a nunrawng a, kan result hi pawm a harsa a ni," tiin a sawi.

NI, Netherlands leh Germany ten point 12 vek an hmu a, inelna zawh hnuah pawh inang vek thei a la ni. Hei vang hian goal difference-in pawimawhna a nei thei a, Northern Ireland manager O'Neil chuan goal thumna an chhuah chu pawi a tih thu a sawi tel bawk.

Netherlands-in Pathianni zan dar 9:30-ah Belarus an tlawh ang a, Germany chu Estonia hmachhawn turin Tallinn-ah an zin bawk ang. Ram ṭha pahnih hi chak ngei tura ngaih an ni a, chutihrualin chak ta reng pawh ni se group C a la ngaihnawm dawn chauh.

November 17-ah Northern Ireland-in an mualah Netherlands an mikhual ve thung ang a, November 20-ah Northern Ireland hian Germany an tlawh zui ang. NI-in an elpui pahnih an la hmachhawn dawn avangin Michael O'Neil hote tan beisei tur a la awm.