Hriatreng tlak inkhel: Iraq & Iran chak

Asian football mai ni lo, khawvel football-a hriatreng tlak pahnih Ningani zan khan a thleng a, he inkhel pahnihah hian Iraq leh Iran ten an khingpui an hneh ve ve. 

Iraq hian kum riat hnua a vawi khat nan mahni mualah competitive match an khel a, World Cup qualifier-ah an mikhual Hong Kong chu 2-0 in an hneh. Kum 2011 hnuah Iraq hian friendly match tih loh chu an mualah an thleng ngai tawh lo a, Ningani zanah erawh thawnthu tih danglam a ni ta. 

Kum 40 hnua a vawi khat nan Iran hmeichhiate chu stadium-ah inkhel en phalsak an ni ve leh ta a, an mipa team ten 14-0 ngawta Cambodia an sawp lai chu a hmunah an en. 

Football khawvela thuneitu sang ber FIFA chuan kum 2011 khan venhimna chungchang avangin Iraq hi competitive match an thlen a phalsak lo a, friendly match erawh an thleng thei thung. FIFA thutlukna angin Iraq hian hun rei tak chu an mualah competitive match an khel lo a, mahse nikum khan FIFA chuan an hrekna hi an hlip. 

Ningani zanah hremna hlih a nih hnua a vawi khat nan competitive match chu Basra International Stadium-in a thleng ve leh ta ngei a, Iraq-in chak result nen fan-te lawmna an thlen. Iraq tan hian Mohanad Ali chuan goal hmahruai a khung a, MLS club Vancouver Whitecaps wing back Ali Adnan chuan penalty aṭangin a chhuih lut bawk - 2-0 in an chak. 

Hei le Iran 

Kum 1979-a Islamic revolution hnu khan Iran-ah hmeichhiate chu stadium-a inkhel en phalsak an ni lo a, kum 40 hnua a vawi khat nan Ningani zanah phal a ni. Inkhel ṭan hma aṭang tawhin hmeichhe fan-ten phur takin stadium an pan a, an hlim hmel hmuh chu nuam tak a ni - an hmuhnawm tih ber kha a hmunah ngei an en thei ta tlat!

Iranian hmeichhiate hmela hlimna belhchhah turin an footballer-ten khelmualah goal an inthunsiak a, 14-0 ngawtin an mikhual Cambodia an lo sawp. 

Asia team ṭha pawl Iran tan hian Karim Ansarifard (4) leh Sardar Azmoun (3) ten hattrick an siam a, Mehdi Taremi (2), Mohammad Mohebi (2), Ahmad Nourollahi, Hossein Kanaanizadegan  leh Mehrdad Mohammadi ten an khung bawk. 

Iran inkhelhna Azadi Stadium-ah fans ṭhenkhat chu 'Blue Girl' tiin an au rual a, a ṭhenin, "FIFA kan lawm e," an ti bawk. 

March khan Iranian hmeichhia Sahar Khodayari chu mipa anga inchei danglama inkhel en a tum manchhuah a ni a, hremna hmachhawn zuam loa inhalin a thi. Sahar-i hi a club ṭan ber Esteqlal of Tehran jersey rawng chawiin 'Blue Girl' tih hminglem pek a ni a, he thil thleng hi FIFA chuan a ngai thutak hle. 

Hmeichhia ten stadium-ah inkhel an en ve ngei theihna turin hma an la nghal a, Ningani zanah Nule Girl-i martar-na chuan hmeichhe tam tak stadium chhung a rah tir ve leh ta. 

Football fans tam tak an la lungawi tawk lo. Mipui 78,000 lenna Azadi Stadium-ah hian Iranian hmeichhia tan ticket 3,500 bak hralhchhuah a ni lo. Ticket hi zawrhchhuah a nih aṭanga minute reilote chhungin a zo nghal a, ṭhutna tur section bik siamsak an ni - inkhel ṭan hma darkar khat velah hmeichhe ṭhutna bik hi a khat tawh!

Amnesty International chuan ticket pekchhuah zat chu 'thiam chan tumna' mai a nih thu an sawi a, stadium-a mipui leng zat aṭanga chhutin an lungawi lo. Hei mai a ni lo - hmeichhe photographer-te chu stadium-ah hian an luh phal a ni lo a, kum 1971-a din stadium-ah hian hmeichhe tan inthiarna mumal a awm meuh lo bawk. 

Asian Football Confederation enkawlna hnuaia ram 47 zinga ram 46 ten qualifier an khel a, Timor-Leste hrem an nih avangin an inlan lo. Tuna khelh mek hi second round a ni tawh a, team 40 chiah an awm tawh - group pariatah, team panga zel awmin ṭhenhran an ni a, group tina pakhatna leh pahnihna zinga a ti ṭha zual pali hian third round an lut ang a, Asian Cup khel turin an tling chiang bawk ang. 

Group-a pahnihna ni si, pahnihna ti ṭha pali zinga tel pha lo chuan Asian Cup qualifying third round bak an khel dawn lo. Ram 12-in third round an lut dawn tihna a ni a, group pahnihah, team paruk ve ve awmin ṭhenhran leh tur a ni. 

Group pahniha a sang pahnih chu World Cup khel turin an tling ang a, pathumna ve vein home & away kalphungin playoff an khel ang. Playoff-a chak zawk team hian inter-confederation playoff an hmachhawn leh ang a, chutah chuan hnehna an chang a nih chuan World Cup khel turin an tling ve leh dawn a ni.