I League club Aizawl FC an thiam

Mizoram Premier League Season 8-ah Aizawl FC-in an thiamna an pholang ṭan a, Ningani zan khan Chawnpui FC chu 2-0 in an hneh a, Standly Rozario hote hi tun season-a tlarhnung phui ber an ni chhunzawm zel.

I League club hian match nga khelh tawh aṭangin point kua an hmu a, chak loh an la nei lo. Chawnpui erawhin FC Venghnuai laka point khat an hmuh bak point an la hmu lo a, table mawngphahah an awm.

Aizawl FC coach Standly Rozario-a'n Chanmari FC nen goal awm loa an inhnehtawk ṭumin an khelh danah a lungawi thu a sawi a, Chawnpui nen pawh player pakhat chiah a thlak. 

Winger ball thiam Isak Vanlalruatfela aiah Sangdingliana a rawn lut a, tlarhnung a siksawi lo. Aizawl FC-in inkhelh ṭan aṭangin inkhel an thunun a, first half-ah 72% zet ball possession neiin lungawi lohna tur awm erawh goal an khung lo. 

Chanmari nen Richard Kassaga-a'n penalty a hlah a, tun ṭumah erawh Ugandan defender hian penalty hlawh chhuak mah se AFC forward F. Lalremsanga penalty pet chu Chawnpui keeper Vannunmawia'n a dansak.

Chawnpui ṭan theih chin second half-ah a tawp a, minute 58-naah Paul Ramfangzauva freekick pet chu MPL best player ni lai Alfred Kemah Jaryan-a'n a khung a, MPL8-a a goal khung hmasa ber a ni.

Minute 78-naah substitute Isak-a'n ṭha zetin a cross a, Remsanga'n a penalty hlah thup nan a tauh goal. Aizawl FC-in an phu ang ngeiin point thum an hlawh chhuak.

MPL round 6 Kolasib-ah khelh a ni dawn a, match hmasa berah Aizawl FC hi I Day Football semifinal-a an hneh loh FC Venghnuai nen an inkhel dawn. Chawnpui FC-in October 18 tlaiah season ṭan hmaa Kolasib-a friendly match khel Chanmari FC an hmachhawn ang.