Sangliana, Republic Gym a chak ber

NEXA Battle of Strength chu October 10, Ningani zan khan R. Dengṭhuama Hall-ah zawh a ni a, Republic Gym aiawh Lalsangliana chu pakhatna a ni. Upper Republic tlangval Sangliana hi Mizo inchai champion a ni mek bawk.

Battle of Strength hi zan thum neih a ni a, exercise chi thum zela intihsiak a ni. Body builder te, powerlifter te, weightlifter te, wrestler te leh natural strength & fitness nei ṭha ho tan inelna hi buatsaih a ni. 

Sangliana hnuai chiahah hian K.Lalramnghaka (Republic Gym) a awm a, MSR Fitness Centre aiawh James Lalhmangaiha chu pathumna a ni thung. Inelna hi Body Building and Fitness Association of Mizoram (BBFAM) buatsaih a ni a, Battle of Strength hma hian ni li awh NEXA Open Fitness an buatsaih bawk. Lunglei Gym aiawha tel J. Lalrinenga chu pakhatna a ni a, Stephen C. Thanmawia (Champhai Gym) leh Vanlalneia (MSR Ftiness Center) te a sang pathum zingah an tel.

Open Fitness-ah hian team inelna awm telin Chhinga Veng chu pakhatna an ni a, pahnihnaah Ocean awmin MSR II chu pathumna an ni. BBFAM hian NEXA Mister, Physique & Sports Model an zawng leh dawn a, October 15 hian Dawrpui Multipurpose Hall-ah Pre Judging neih a ni ang.