Euro 2020 khel turin Belgium an tling

Belgium chuan Euro 2020 qualifier-ah 9-0 ngawtin San Marino an sawp a, nakkuma khelh tur European Championship inpetkai hmasa ber an ni. 

Inter Milan striker Romelu Lukaku chuan goal hnih a khung a, Nacer Chadli, Toby Alderweireld, Youri Tielemans, Christian Benteke, Yari Verschaeren (penalty) leh Timothy Castagne ten goal khat ṭheuh an thawh bawk. 

Belgium-in goal khung pui an mamawh loh teh lul nen Cristian Brolli chuan an lamah a ti lut bawk a, Belgium-in chiang taka hnehna chang chungin Euro 2020 an inpetkai - Pathianni zan dar 6:30-ah Kazakhstan an lenchilh chhunzawm dawn. 

Scotland-in qualifier hmanga beiseina an neih a thamral a, group I inkhel dangah Russia chu 4-0 ngawtin an ngam lo. Mahse, Nations League khelh zawh takah group leader an nih avangin nakkum March-ah playoff an la khel thei ang. 

Belgium-in minute 28-naah goal an khung ṭan a, goal hmahruai khungtu hi Manchester United duh loh Lukaku a ni. Minute 41-naah Chaldi chuan a rawn chhunzawm ve nghal.

Brolli-a'n an lama a tih luh hnuah Lukaku hian a goal hnihna a rawn khung ve leh a, Alderweireld leh Tielemans ten an rawn chhunzawm ve leh zat. First half a zawh hian Belgium-in goal ruk an khung fel der tawh a, San Marino tan European team ṭha laka comeback beisei ngam chi a ni lo. 

Hetihlai hian bench lamah Michy Batshuayi, Christian Benteke, Divock Origi leh Yannick Carrasco te ho hmel hmuh tur a lawm a, San Marino tan mangchhia a ni. 

Belgium-in first half-ah goal ruk ngawt an khung tawh avangin inthlahrun phah an tum lo a, an goal khung ṭhulh an tum chuang lo. Lukaku thlak tura bench aṭanga luhtir Benteke chuan minute thum pawh khelmualah hun a hman tlin hmain goal a rawn khung ve lehnghal a, 7-0 a ni. 

Minute 84-naah penalty an hmu a, kum 18 mi Verschaeren chuan Belgium tana a goal hmasa ber ni turin a khung. Timothy Castagne chuan minute 90-naah defender mah ni se goal khung a thiam ve tho tih pholangin a rawn khung ve leh a, chiang takin Belgium an chak. 

San Marino lakah Belgium hi chak tur chianga dah an ni a, an squad leh player-te khelh dan entu tan chuan he team hi an ṭha tih hai rual a ni lo. 

Goal veng turin Thibaut Courtois an dah thei a, Alderweireld, Thomas Vermaelen, Jan Vertonghen, Eden Hazard leh Lukaku te hmuh bawk chu thlamuanna tham a ni. Penalty aṭanga goal khungtu Verschaeren hi Belgium tan age level hrang hranga lo inlan tawh a ni a, Anderlecht tan attacking midfielder niin hmabak a nei êng hle - ram tan match hnih a khel tawh. 

Right back Timothy Castagne kha kum 23 mi lek niin Italian club Atalanta tan a khel mek a, Europe club lian zawkah kan hmu thuai ang. 

Moscow khawpuia inkhelah Russia-in Scotland hneh turin harsatna an nei lo a, an mikhual lakah ṭhat chhuah duh loin goal li ngawt an lo khung. 

Russia tan hian Arsenal Tula striker Artem Dzyuba chuan goal hnih a khung a, ram tan match 39-a khelha goal 23 a khungna chiah a ni - Scotland squad pumpuiin ram tana goal an khung zat nen a in ang! Zenit Saint Petersburg     midfielder Magomed Ozdoev chuan a rawn chhunzawm ve leh a, Monaco attacking midfielder Aleksandr Golovin chuan a hnu a rawn khar. 

Russia-in hnehna an chan avangin group I-a Belgium hnungzui tur an ni tain a lang a, Pathianni zan dar 9:30-ah Cyprus an hneh chuan an tlang ang.