China an inhnukdawk

Hri leng mek 'coronavirus' chuan China tan harsatna a siamsak mek zel, ram leh ram mipa tennis team hmanga inelna Davis Cup-ah inlan turin inziaklut tawh mah se an inhnukdawk leh hnuhnawh.

China hi March 6-7 chhung hian World Group I playoff-ah Romania nen inhmahchawn tur an ni. Mahse, inelna an khelhna tur Romania hmar lama awm khawpui pakhat Piatra Neamt chuan China nena inkal pawh hi an duh rih lo.

International Tennis Federation (ITF) chuan thuchhuah siamin, "Davis Cup aṭanga China inhnuhdawhna hi kan pawmsak, tunlaia hri leng hi an ramah a darh mek zel a ni a, an harsatna tawh mek hi kan hriatthiamsak a ngai a ni," tiin a sawi.

China rama neih tur infiamna hrang hrang pawh ṭhulh a ni nual tawh a, ṭhenkhat erawh a hun sawn a ni thung. Formula 1, World Indoor Championship leh Snooker China Open te chu an neih hun tur sawn hlat a ni.