McGregor vs Poirier 2 Poirier hmaah dawl zawrin McGregor a zawr
Conor McGregor-a chuai tawh em ni? Ni lo, Irish fighter hi a la chuai lo - Dustin Poirier a ṭha ta mah mah a ni zawk e!
Pathianni zing khan UFC 257-ah fighter rothap pahnih an intawng a, Dustin Poirier-a'n hnehna chang turin round hnih khelh bak a mamawh lo.
Abu Dhabi-a fighter pahnih intawnnaah Poirier-a'n round hnih chhung lekin McGregor-a knockout a, UFC fighter ropui huangah a hming ziah kaiin a awm tawh ang.
McGregor chuan, "Chhuanlam tur engmah a awm lo. Dustin khan a khel ṭha takzet a ni. Vawiin hi theihnghilh a, kir thei tura inbuatsaih ka mamawh a ni," tiin a chak loh a pawm thu a sawi.
Ke hmang thiam Poirier
Mipui 18,000 lenna Etihad Arena-ah fans 2,000 chiah an awm phal a ni a, fighter ropui pahnih inhnek tur boruak a 'hot' loh phah lo thung.
Inhnek ṭantir lamah McGregor-a'n a hnek chhuak tam a, Irish fighter hian inhnek hmaa boxing a zir nasat thu an sawi chu a chhawr ṭangkaizia lantir a tum.
Mahse, kum 2014-a fighter pahnih intawn ṭum ang ngawtin Poirier-a zam duh tawh lo a, a thiam ang taka a ke hmang ṭangkaiin McGregor-a pet fuh hnem hle.
McGregor chuan, "Ani aiin ka chak zawkah ka ngai a, mahse min pet kha a thiam tlat a, kha kha ka inveng hneh lo a ni. Khatiang taka ke hnuai lama a pet thiam dan kha ka la tawng ngai lo a, ka insiamṭha thei lo a ni," a ti.
Thlunglu a hai!
Round khatnaah fighter pahnih an inngam tawk viau a, round hnihnaah erawh McGregor-a'n a duh loh a tawng - Poirier-a'n a pet tam avangin Irish fighter ke chheh a fuh lo a, Poirier-a'n chiang zetin a hnek fuh bawk.
American fighter hian McGregor-a hnek fuh hnuah tha thlah loin a hnek chhunzawm a, UFC weight division hnih champion ni tawh McGregor tan din rengna chi a ni lo - a lu a hai tawh tlat!
Round hnihna, minute hnih leh second 32-naah knockout hmangin Poirier a chak a, khawvelin mak tiin a thlir reng a, McGregor tan chak loh zawk nihna pawm mai loh chu tih theih a awm lo.
McGregor chuan, "Hrehawm ka ti a, pawmthiam a harsa takzet a ni," tiin a tlawm chu hrehawm a tih thu a sawi a, mahse, Irish fighter tlawm hlenna tur a nih ring suh.
Hmanah chuan...
September 2014 khan featherweight-ah fighter pahnih hi an lo intawng tawh a, McGregor-a'n fighter ṭha zawk a ni tih pholangin Poirier hi second 106 chhung lekin a hneh.
Poirier hian hemi ṭum hian McGregor-a thluak 'game' a phak loh vanga tlawm a nih thu a pawm a, he inhnek hian Irish fighter chu khawvela fighter ngaihven hlawh pawlah a chhuah laiin Poirier erawh a bul aṭanga a ṭan ṭhat leh vek a ngai.
'The Notorious' hming lem an pek McGregor hian UFC-a weight division hnih champion kawp thei hmasa ber record a siam a, boxing-ah zuang lutin boxing khawvela sum tam berna pawlah Floyd Mayweather hial a hmachhawn.
Hetihlai hian Poirier erawh McGregor angin ngaihven a hlawh lo a, theihtawp erawh a chhuah reng - McGregor nen a vawi hnih nana an intawn leh hma hian vawi 13 fight a hmachhawn hman a, vawi hnih chiah a tlawm.
Thawnthu a danglam
McGregor erawh larna leh sumin a um a, Poirier nen an intawn hmasak hnuah vawi riat chiah fight-a hmachhawn - October 2018-a Khabib Nurmagomedov a ngam loh hnuah octagon chhungah second 40 chiah hun a hmang.
January, 2020 khan Donald 'Cowboy' Cerrone a hneh a, hemi hnuah fight a hmachhawn leh tawh lo - November 2016 hnuah khan Poirier-a'n vawi kua fight a nei a, McGregor erawhin vawi thum chiah a nei thung.
Poirier chuan, "He fight hian thil tam tak a keng a, mahse, phuba lakna erawh a ni lo - chutiang zawng chuan ka thlir lo. Kan intawn hmasak kha chuan fighter hlauthawng tak ka ni a, tunah erawh McGregor hi keimah ang thoa thisen chhuak ve thei a ni tih ka hria.
"Ka tum ber chu technical taka fight hmachhawn a, fimkhur taka khelh kha a ni. Atthlak taka chet buan buan ka tum lo," tiin a ruahmanna a hlawhtlinpui thu a sawi.
Hmabak chu
October 2020 khan MMA fighter ropui ber ang hiala mi tam takin an ngaih Khabib Nurmagomedov chuan Justin Gaethje hnehin chawlh a puang a, mahse, lightweight tile a kawl lai erawh inchuh theiha dah a la ni lo.
Kar hmasa khan UFC president Dana White chuan, "Khabib hian thil danglam tak a hmuh chuan lo kir a hreh lo," tiin Poirier vs McGregor-a che ropui zawk tan Khabib hmachhawn theihna remchang a inhawng turah a ngai.
Mahse, UFC 257 zawhah White chuan, "Khabib hian, 'Heng fighter-te chungah daih hian ka awm a, an pahnih hian ka hneh ve ve tawh a ni,' tiin min hrilh a, a êng zawnga sawi a harsa," tiin Khabib lo kir a rin loh thu a sawi.
Khabib hian September 2019 khan McGregor-a hneh hnuah Poirier hi a lo hneh leh tawh a ni - McGregor erawh boxing lamah kan hmu zui mai thei a, Manny Pacquiao nen sawizawm an ni. Pacman hian UFC 257 hma hian, "Conor duhsakna ka hlan a che - kum 2021 hi fight fan-te tan kum duhawmah siam ang hmiang," tiin duhsakna a hlan.
A chhehvel
Khawthlang media-ten an tarlan dan chuan McGregor hian fight aṭang ngawr ngawrin pound maktaduai 3.65 vel a dawng dawn a, pay-per-view aṭangin share a la nei leh bawk ang.
McGregor hian PPV aṭanga a share a hmuh chuan pound maktaduai 14 chuang chu a hmu ngei tura ngaih a ni a, Poirier hian £730,000 chu a dawn chian tur a ni thung - ani pawh hian PPV aṭangin share a nei leh dawn a, maktaduai tel chu a hlawh dawn.
Fighter pahnih hi an intawn hmain ṭum dang ang lo takin ṭawngkamin an inbei tam lo - McGregor hian midang ṭanpui tura Poirier-a din foundation hnenah $500,000 a pek tur thu a sawi a, Poirier hian McGregor chu ama brand, 'Louisiana hot sauce' a pe bawk.
UFC-a fight ngaihven hlawh dangah Michael Chandler chuan round khatna lekah technical knockout hmangin Dan Hooker a hneh a, Bellator MMA lightweight champion vawi thum ni thei Chandler hi UFC-a fight vawi khat a hmachhawnna a ni.
McGregor leh Poirier intawn hma, co-main event-a hnehna chang Chandler hian, "Conor McGregor, mak i ti em? Lightweight-ah lal thar a piang e," tiin lal thar a nih thu a puang a, Irish fighter a cho nghal.
UFC 257 Results
Main Card
Weight class Hming Hming Hneh dan Round Time
Lightweight Dustin Poirier def. Conor McGregor KO (punches) 2 2:32
Lightweight Michael Chandler def. Dan Hooker TKO (punches) 1 2:30
Women's Flyweight Joanne Calderwood def. Jessica Eye Decision (unanimous) (30–27, 30–27, 29–28) 3 5:00
Middleweight Makhmud Muradov def. Andrew Sanchez TKO (flying knee and punches) 3 2:59
Women's Strawweight Marina Rodriguez def. Amanda Ribas TKO (elbow and punches) 2 0:54
Preliminary card
Weight class Hming Hming Hneh dan Round Time
Catchweight (157 lb) Arman Tsarukyan def. Matt Frevola Decision (unanimous) (30–27, 30–27, 30–26) 3 5:00
Middleweight Brad Tavares def. Antônio Carlos Júnior Decision (unanimous) (30–27, 30–27, 29–28) 3 5:00
Women's Bantamweight Julianna Peña def. Sara McMann Submission (rear-naked choke) 3 3:39
Light Heavyweight Marcin Prachnio def. Khalil Rountree Jr. Decision (unanimous) (29–28, 29–28, 29–28) 3 5:00
Early preliminary card
Weight class Hming Hming Hneh dan Round Time
Catchweight (150 lb) Movsar Evloev def. Nik Lentz Decision (split) (28–29, 29–28, 29–28) 3 5:00
Flyweight Amir Albazi def. Zhalgas Zhumagulov Decision (unanimous) (29–28, 29–28, 29–28) 3 5:00