Rockstar Osvaldo a lo kir leh ta!

Italian striker Dani Osvaldo chuan kum li zen zawn rimawi khawvela hun a hman hnuin khelmual a rap leh ta a, Argentine club Banfield tan Thawhṭanni zan khan a inlan. 

Kum 34 mi striker hian kum 2016 khan inkhelh a chawlhsan thu a puang a, football khawvela titi lengvak chuan a nun a tihbuai thu leh a hmangaih football a hne phah thu a sawi. 

Inkhelh a chawlhsan hnuah rimawi khawvel a luhchilh a, band Barrio Viejo-ah inhmangin a zai tu ber a ni - nikum khan mi lar leh professional dancer-te lam hmanga intihsiakna Ballando con le Stelle-ah telin pathumna a ni phak hial!

Mahse, Osvaldo hian football khawvel a luhkhung ve leh ta thung a, Argentine club Banfield tan khelin a lo kir leh hnua a match hmasa berah River Plate hmachhawnin goal a khung nghal 

teuh hle. 

Italy tan vawi 14 inlana goal li khung thei Osvaldo hian tun hmain club langsar tak tak  Espanyol, Roma, Fiorentina, Southampton, Juventus, Inter Milan, Porto leh Boca Juniors tan pawh a lo khel tawh a, Saints tana a khelh lai hian a team mate Jose Fonte nen training-naah an insual avangin a contract tihtawp sak a ni tawh!

Kum 2011 khan Roma tana a khelh laiin a ṭhianpa  Erik Lamela a hnek avangin suspend a ni a, kum 2016 khan dressing room-ah meizial a lo zuk avangin Boca Juniors chuan an suspend nia sawi a awm bawk. 

Rock festival-a kal a duh avanga Sevilla sawmna lo hnar tawhtu hian Banfield-ah kum khat atan contract a ziak a, January khan Argentine club hi a zawm a ni.