Mizoram Super League Season 6 Inelna hmachhawn turin Khatla TBL an inpeih

Mizoram Super League season 6 khel turin Khatla TBL a inpeih tawh, coach Lalrinzuala chuan tualchhung basketball inelna sang ber an khelh leh hunah chuan tun hma lama TBL kan hmuh ṭhin ang kha lantir leh an tum thu a sawi.

MSL season hmasa pahnihah Khatla TBL hian  nomawi an chawi, a hnu lamah erawh Mission Veng Vikings leh Zarkawt BCA an ngam lo - kuminah hian a vawi thum nana champion hmasa ber nih an tum dawn.

Khatla TBL coach Lalrinzuala chuan, "Kumtir aṭang khan MSL atan hian kan inbuatsaih ṭan der tawh, player an thawkrim em em a, tunah chuan inelna tak hmachhawn tur pawhin an inpeih tawh," tiin Vanglaini a hrilh.

TBL hian tlai bakah zan lamah training an nei ṭhin a, captain H. Laldinsanga hoa inlan tur an nih avangin inrintawkna an nei sang, Mapuia leh senior player Vanlalnunsanga ten player tawnhriat nei tlem zawk an kaihruai ang.

Inelna chungchang sawiin Rinzuala chuan, "Tun hnaiah BCA an ṭha ṭhin a, kuminah erawh kan elphak ang. MSL-ah chuan ṭha tak vek kan inel dawn, keini chuan semifinal mai ni loin champion kan tum dawn," tiin a sawi.

TBL hi an tualchhung player ten training an nei ṭha a, state pawn player pawh MSL ṭan tir aṭangin chhawr theih an beisei. United States tlangval Xavier Dupree leh Punjab player Arshpreet Singh Bhullar te kan 

hmu dawn.

Coach Lalrinzuala chuan, "Kar leh lamah chuan Xavier Dupree hi a rawn thlen kan beisei, a tir aṭangin thapui kan thawh nghal dawn a ni," tiin Vanglaini hnenah US player chungchang a sawi a, 6ft 10in zeta sang power forward Dupree hi Mizo basketball fans tan en tham a ni ang.

MSL vawi hnih champion tawh Khatla TBL hian tun season an match hmasa ber atan February 28, Thawhlehni zan hian team thar Chanmari Vikings an hmachhawn ang. Vikings hi season hmasa lama Mission Veng Viking 

ṭhin kha niin, tunah chuan Chanmari hming an pu tawh.