Europa League Last 32 Khualmualah Man United leh Arsenal

Europa League-ah club ṭha an awm belh a, last 32 aṭangin Champions League aṭanga tla thla Ajax leh Inter Milan te an inlan ṭan dawn. Premier League aṭangin Manchester United, Arsenal leh Wolverhampton Wanderers te an la dam, zanin hian an inlan vek dawn.

Manchester United hian zan dar 11:25-ah Club Brugge an tlawh dawn a, zan dar 1:30-ah Arsenal-in Karaiskakis Stadium-ah Olympiacos Piraeus an hmachhawn dawn. Wolverhampton Wanderers erawhin zan dar 1:30-ah Espanyol an mikhual thung ang.

Manchester United-in match li chhung hneh loh an tawng tawh lo a, match hnuhnung berah an elpui Chelsea chu an mual Stamford Bridge-ah an hneh a, season tharah Europa League khel nawn tawh lo turin ṭan an la mek.

 

Tun season-ah erawh Ole Gunnar Solskjaer hote tan duhthlan tur a awm lo a, Europa League chu an champion theihna zinga mi a la nih avangin an ngaih thutak a ṭul. English club hi group L hmahruaitu an ni a, vawi ruk an khelhah vawi li chakin inhneh tawk leh chak loh vawi khat ve ve an nei. Amaherawhchu group stage-ah chuan Solskjaer-a'n inelna a la thu tak tawk lo a, player hrang 32 zet a hmang.

Norwegian manager Solskjaer tana chanchin lawmawm chu Chelsea an hneh ṭumin inhliam vanga hun rei tak chawl Eric Bailly a khel ṭha a, defender Harry Maguire-a'n goal a khung. Sporting aṭanga an lakluh Bruno Fernandes pawh a rintlak a, United-in hun rei tak a nei tawh loh 'deadball specialist' an nei tharah a ngaih theih bawk.

United ṭantute en châk tur erawh Odion Ighalo a ni a, Nigerian striker hian loan hmanga English club zawm tur hian a hlawh a tihhniam avangin a inkhelh hma hauhin United ṭantuten a ngaina der tawh. Solskjaer-a'n Watford striker hlui hi training a la zawm rei lo chungin khelhna hun a pe tawh a, Club Brugge laka hun rei zawk a khelh theih beiseiin United ṭantute an men rei phah ngei ang.

Club Brugge hian 2014-15 season hnuah Europa League knockout stage an thleng leh chauh a, English club nen an inhmachhawn hnuhnung 10-ah chak an nei lo. Chutihrualin Belgian league-ah erawh match 13 chhung hneh loh an tawng lo a, Manchester United tan chetsual theihna tur a ni.

Mikael Arteta hnuaia Arsenal ṭhat dan chiah hi hriathiam a la har hle. Gunners hian Spanish manager hnuaiah 'game mawi' an khel nghal a, result ṭha neih erawh an harsat. Thlasik chawlh zawhah London club-in Newcastle United 4-0 in an sawp a, an ṭha tak tak em tih chu zanina Olympiakos Piraeus an hmachhawn hunah a hriat ang.

Arsenal hi an phur vanglai tak a ni a, Alexandre Lacazette-a'n December thlaa Standard Liege nen 2-2 a an inhnehtawk ṭuma goal a khung hnuah Newcastle nen kartawp khan goal a khung leh chauh. French forward hian match kua hnua goal a khung lehna chauh a nih avangin a goal khung pawh a lawm nasa hle. 

ṭantute lawmna tam tak zinga pakhat chauh a ni. Mesut Ozil-a'n midfield-ah ro a rel leh ṭan a, pound maktaduai 72 man Pepe thiamna leh theihna hmuh chhoh a ni ta bawk. Bundesliga-a hming chher tawh Pierre-Emerick Aubameyang a la 

ṭha reng a, Gabriel Martinelli-a'n hmabak a nei êng.

Europa League a nih miau avangin Arteta-a'n player naupang zawk a chhawr thei a, player rinrawl an dahṭhat chuan Martinelli leh Bukayo Saka ten hmun pawmawh an chang. Greek club lakah Arsenal rinkai zawk an ni dawn a, chutihrualin Olympiacos hi Champions League thlenga tawnhriat nei ṭha an ni.