Andre Gomes a lo kir hnai

Carlo Ancelotti kaihhruaina hnuaia harh tharna chang Everton chuan thu lawmawm an nei, midfielder Andre Gomes hliam a dam tawh. Pathianni zana Arsenal nen Premier League an khelh hunah Gomes hi a inlan theih tawh beisei a ni.

Kum 26 mi Gomes hi nikum November thlaa Tottenham nen an inkhelh ṭumin a ka rek dinglam a hliam, tunah chuan an midfielder hi a dam tawh - training zawm tawhin kar hmasa khan friendly match pawh a khel thei tawh.

Everton manager Ancelotti chuan, “Hun rei tak hnua match a nei leh chu eng nge a boruak tiin ka zawt a, ka hmuh dan chuan inkhel turin a inpeih leh tawh. Player an inhliam hnu hi chuan bench aṭanga luhtir ai chuan inkhel bul ṭan thei se an tan a ṭha zawkin ka hria.

“Amaherawhchu, tunah hian thutlukna engkim siam nghal chi a ni lo, muang changin kan la sawi khawm leh ang a, chumi hnuah player leh club tana ṭha ber tur chu a rawn chhuak mai ang,” a ti.

Portugal international hian season hmasa kha Barcelona aṭangin Everton tan loan-in  a khel, kuminah pawh English club tan hian loan bawkin a khel zui leh, match sarih chauh a khel hman tihin hliam vangin a chawl zui ta reng a ni.