England zia a lang chhuak

Euro 2020 qualifier-ah England-in bul ṭan ṭha viau mah se hun pawimawhah an zia an chhuah a, Czech Republic lakah an tlawm. 

England hian an mikhualna ramah hian hnehna chang ni se chuan Euro khel turin an tling chiang ang. Mahse, Prague khawpuiah 2-1 in an chak lo. Three Lions tan Harry Kane chuan minute ngana lekah penalty hmangin goal hmahruai khung mah se Czech hian Jakub Brabec leh Zdenek Ondrasek hmangin an chhanglet a, an chak. 

England hian zanin dar 12:15-ah Bulgaria an lenchilh dawn a, hnehna an chan a, Kosovo-in Montenegro an hneh loh chuan an tlang ang. 

England-in minute ngana leka Lukas Masopust-a'n Raheem Sterling a tih tluk avangin penalty an hmu a, Kane chuan goal-ah a chantir. Mahse, an hlim chhung a rei lo. Czech defender Brabec chuan minute li liam hnuah corner aṭanga ball kal chu si phurh sut nan a khung a, 1-1 a ni. 

Three Lions an insiamṭhat phah lo. Hun tawp nan minute nga chauh a awm tawh tihah substitute Ondrasek chuan goal khat a khung leh a, mualneitu an chak. England hian October 10, 2009 khan Ukraine chu 1-0 in an ngam lo a, Zirtawpni zan inkhel hi Ukraine laka an result hnua qualifier-a an tlawm leh hmasak ber a ni. 

Kosovo lakah England tlarhnung an mualpho tawh a, Czech laka an chak loh chhanah pawh tlarhnung chu puh tur an ni. Everton goalkeeper Jordan Pickford-a'n hna a nei deuh reng a, Vladimir Coufal, Masopust leh Alex Kral laka a save neih chu England mualphona khuhtu a tling. 

Brabec-a goal khung danah tlarhnung lam an inringthul tih a lang a, Everton defender Michael Keane hi ram tana khel tur khawpin a ṭha tawk lo em ni aw, tih a awl. 

Full back pahnih Danny Rose leh Kieran Trippier ten an theihna angin an khel chhuak lo a, bench-ah Trent Alexander-Arnold leh Ben Chilwell te an la awm ve bawk avangin first XI an chang reng kher lo ang. 

Gareth Southgate-a thutlukna siamsual zingah Mason Mount bul ṭantir chu a tel a, Chelsea midfielder hi England tana bul ṭan tur meuh chuan a la nau deuh a ni. 

Jordan Henderson leh Declan Rice ten beisei an phak bik loh avangin tlarhmaa Kane, Sterling leh Jadon Sancho te inkawp pawh an hlauhawm tawk lo. English midfielder-ten an striker-te ball-in an chawm hneh tawk lo a, mahse hliam dam hlim Dele Alli leh Alex Oxlade-Chamberlain te squad-ah an tel lo tih hriat a ṭha. 

Heti chung hian Kane leh Sterling ten chance an nei tho a, mahse Czech si ban nghaktu Tomas Vaclik chuan ṭha takin a dansak.