Chanmari leh Mama an inṭhen

Mizo football legend S. Malsawmtluanga chuan Chanmari FC aṭanga banna a thehlut a, nimin khan club hian an pawmsak. MPL vawi hnih champion tawh club hian Mama thlakna tur an la puangzar lo.

MPL khelh mekah Chanmari hian match nga an khelh tawh aṭangin point riat an hmu a, an match hnuhnung berah I Day Football finalist FC Venghnuai 2-1 in an hneh bawk. Chanmari hi round 5 zawhah point riat hmuin palina ni pha mah se an chungah team thum an awm. Mama kaihhruai team hian MFA Super Cup final an thleng a, I Day Football-ah erawh group stage an paltlang lo.

CFC president Zo­thantluanga chuan "Chan­mari FC tan hun hrehawm tak a ni a, Mama nena thawhho kha a ropui kan tiin kan ngaihlu em em a ni. Kan thawkho thei kha lawmthu kan sawi a, a kal zelna turah duhsakna sang ber kan hlan a ni," tiin a sawi.

Chanmari FC hian round 6-ah season ṭan hmaa Mama hoa an tlawh Kolasib-ah table mawngphaha awm Chawnpui FC an hmachhawn dawn. Mama thlakna tur an nei hman ang em tih a la hriat loh.