Ranieri-a'n Sampdoria a enkawl dawn

Chelsea leh Leicester City manager hlui Claudio Ranieri chu coaching lamah a lo kir leh ta a, Serie A club Sampdoria chu kum 2021 thleng enkawl turin contract a ziak. 

Sampdoria hian an beisei ang result an neih theih loh hnuin coach Eusebio Di Francesco chu an ban a, a hmun ruak luah turin Ranieri hi an lalut ta a ni. Di Francesco hi March thla khan AS Roma chuan a hna aṭangin an lo chawlhtir tawh a, Ranieri bawk hian a lo thlak tawh!

Kum 67 mi Ranieri hian Italian top flight-ah vawi kua ngawt manager hna hi a lo chelh tawh a, Serie A-ah hian a mikhual lutuk lo ang. Chelsea boss hlui hian kum 2016 khan Leicester City chu Premier League nomawi a chawipui a, football khawvel a barakhaih. 

Mahse, nomawi a chawi aṭanga thla kua hnu lekah ban a ni a, 2017-18 season khan French club Nantes a enkawl. November 2018-ah Premier League-ah a kir a, Fulham a enkawl. Mahse, Cottagers hian ni 106 hnu lekah an ban a, March khan season tawp thleng atan Roma a pan. 

Italian club hi Serie A-ah parukna nihpuiin season a khar a, Champions League chu point thum chiahin an khel phak lo a ni. October 20-ah Sampdoria hi a vawi khat nan a kaihruai dawn a, a club hlui AS Roma an mikhual ang.