Biles-i'n medal la hnem record a nih rual

Simone Biles chuan World Gymnastics Championships-ah gold medal a lak belh leh ta a, gymnastics huanga medal la hnem ber Vitaly Scherbo-a record (23 titles) chu a nih rual ta.

American gymnast Biles hian 'vault' huangah gold medal a la leh a, gymnastics inelna a hmachhawn tawha medal a lak zawng zawng chu 23 a tling chiah - gold medal bik chauh pawh 17 a nei tling tawh.

Biles hian record thar siam theihna hun a nei. Mahse, uneven bars final-ah pangana chauh a nih phak avangin medal a lak belh thei rih lo, record thar siam tur chuan inelna dang a nghah leh rih a ngai dawn.

Kum 22 mi Biles chuan, "Mi ten record ka nih rual tih min hrilh a, ka mumang ni loin a tak chu a lo ni reng si. He infiamna ka luhchilh tirh khan engtik hunah emaw chuan khawvel huapah gold medal pakhat tal ka la ve ang tiin ka suangtuah ṭhin, tunah chuan beisei phak bakin malsawmna ka dawng a ni," a ti.

Rio Olympic-ah khan Biles hian US tan gold medal pali leh bronze medal pakhat a hlawh chhuak a, nakkuma neih tur Tokyo Olympic-ah pawh ram dangte tana elpui hautak leh huphurhawm a ni phak ang.