Euro 2020 khel tur Italy

World Cup 2018 an tlin loh hnuin Italy chuan major tournament an khel ve leh dawn ta a, Euro 2020-ah Roberto Mancini enkawl team hi kan hmu dawn. 

Italy hian Inrinni zan khan an mikhual Greece chu 2-0 in an hneh a, match sarih aṭanga point 21 neiin group khata an awmpuite tan um phak theih an ni tawh lo. Greece an mikhualna inkhelah hian Italy-in beisei an phak lo a, first half-ah target-a shot an nei miah lo - fan-ten an au el hial. 

Mahse, second half-ah Italy an insiamṭha a, Chelsea midfielder Jorginho-a penalty leh Federico Bernardeschi-a shot hmangin goal an khung a, 2-0 in an chak. Italy coach Mancini chuan, "Hmabak tam tak kan la nei a, mahse European team ṭha pawl ni turin kan hlat tawh lo," tiin a sawi. 

Sergio Ramos chuan European player goalkeeper ni lo zinga  ram tana inlan hnem ber record a siam a, Inrinni zana Norway nen 1-1 a an inhnehtawkna inkhelah a inlan. Real Madrid defender hi ram tan match 168-a inlanna chiah a ni a, goalkeeper Iker Casillas lehpelin Spain tana inlan hnem ber record a siam tel nghal. 

Ramos-a record siam zanah Saul Niguez chuan Spain tan goal hmahruai khung mah se Norway-in injury time-a Josh King penalty hmangin an chhanglet. Spain hian Euro 2020 khel chiang tur chuan match khat an nghah leh a ngai tihna a ni a, Thawhlehni zanah 4-0 a Malta sawptu Sweden an inhnehtawkpui chuan an tlang ang. 

World champion France-in Zirtawpni zan khan 1-0 in Iceland an hneh a, Frank Lampard chhawr duh loh Olivier Giroud chuan penalty aṭangin he inkhela goal awmchhun hi a khung. Giroud-a'n ram tana a goal 37-na a khung laiin Chelsea tana a khelhpui N'Golo Kante erawh warm up neih laiin a inhliam a, France coach  Didier Deschamps chuan ngaihtuahawm a nih loh thu a sawi. 

Turkey chuan hun pek belha Everton striker Cenk Tosun-a goal hmangin Albania chu 1-0 in an hneh a, France awmna group H-ah hma an hruai zel. Zanin dar 12:15-ah France leh Turkey hi an inkhel dawn a, pathumna Iceland hian beiseina an la neih ve bawk avangin France leh Turkey inkhel hi a 'hot' viau ang.